嚟緊又有冷鋒到，又係打邊爐嘅好時機。尖沙咀前排開咗間火鍋店，除咗食嘅牛肉部位夠刁鑽之外，仲有間手工啤酒廠喺入面，可以一路打邊爐一路飲住最新鮮嘅ON TAP手工啤！

入到餐廳見到好大隻牛牛分佈圖，就知呢度係主打牛肉啦，當中有啲部位仲係每日限量供應添。牛肉主要係嚟自山東嘅騸牯牛，負責人話呢種牛脂肪多啲，比較適合用嚟打邊爐。

牛朴肉即係牛頸上運動最頻繁嘅肉，脂肪雪花多得嚟又好平均，夠肥夠嫩口。

挽手腩接近牛胸，係連接爽腩同坑腩嘅部分，咬落有啲韌度。

金花趾，係牛後腿對應三花腱嘅位置，筋同紋路都比較多，好彈牙。

吊龍伴就係腰脊肉嘅兩側，肥肥地幾滑身。

至於是日精選，開飯仔去採訪嗰日就係牛腩頭，脂肪相對多啲，口感腍身。

 牛滑

 (左)牛肉餃、(右)野菌拼盤及羽衣甘藍

另外仲有其他部位如滑尾龍、匙皮、牛腩心等等都有得叫，講咗咁多肉，講下個湯底，暫時有五種湯底：牛骨清湯、牛雜湯底、麻辣湯底、沙嗲湯底同鴛鴦麻牛湯底。鍾意食內臟嘅朋友仔，當然就揀牛雜湯底啦，咩都集晒！

至於食得辣嘅話，無懸念啦，麻辣湯底。先用大紅袍、指天椒之類三種辣椒再加花椒之類炒4-5個鐘，等啲辣味同紅油滲透晒之後，加入已經用牛骨熬咗6個鐘嘅湯底度，無論麻度定辣度都有返咁上下，可以一止辣癮。

滿足完牛魔王，輪到滿足酒鬼喇！一入到門口就見到「醉生夢醒」四個大字，一排啤酒樽同成套酒鍋設備，就知道呢度有埋個小型嘅釀酒廠了。酒廠入火鍋店，新鮮手工啤配新鮮牛肉火鍋店呢個concept都係全港首創。

 (左)鹽田、(右)sugarcane stout

由過濾鍋到煮沸鍋到發酵缸等，整個釀酒嘅過程都可以喺度發生晒，仲有6個龍頭嘅ON TAP手工啤，選擇有果味較重嘅鹽田、甘蔗香搭重烘烤麥芽味嘅sugarcane stout等，一個platter試晒6款都得。

要特別介紹下嘅係原漿，麥子專為火鍋店而釀嘅，甜甜地酸酸地，比較清淡，配牛肉火鍋呢啲濃味啲嘅食物就啱晒喇。

616麥子
地址：尖沙咀赫德道4號The Hart 1樓

文、相：Kar