有時一大班friend出去chill，偏偏自己有酒精敏感；又或者嗰排狀態唔好，飲多兩杯都好易醉，但又好想飲喎，以後唔使煩啦，全球首創嘅無酒精蒸餾酒品牌兩年前喺英國面世，最近終於嚟到亞洲，登陸香港喇！

話說創辦人本身都係唔飲酒嘅，但就好想發明一隻仿酒嘅飲品，令酒精敏感或者唔好酒嘅朋友，都可以一齊cheers！Seedlip冇卡路里，又冇糖份、代糖同人造香料，每樽都經過浸漬、銅鍋蒸餾同過濾嘅過程而製，要六個禮拜先做好一樽㗎。

暫時有兩種口味，Seedlip Garden108同Seedlip Spice94，兩款飲落都係酸酸地，又帶啲花香同果香嘅感覺，又，以前者較易入口。前者係用自家農場生產嘅豌豆、乾草等再加入唔同嘅天然香草，例如薄荷葉、迷迭香同百里香等調製而成；至於後者，用嘅香料就比較濃烈，包括全香果同豆蔻，再混入檸檬、西柚皮、橡樹皮等，配搭tonic water咁飲就最啱喇，又或者拎嚟整返杯Martini無酒精版都得。

香港亦有餐廳特地為佢調製咗啲cocktail。好似COA就用Spice94，加入食用花等材料去製作咗杯充滿花香味嘅Spice94 wth Lacto Fermented Hibiscus。

同樣都係用Spice94去調製嘅，仲有Potato Head嘅Seedlip Sour。呢杯仲混埋甜薯、檸檬汁同菠蘿等等，賣相好靚，飲落亦酸酸甜甜，小清新嘅感覺好啱呢啲天氣飲。

VEA就用Garden108加蒸餾蜜桃茶、柑橘等調出English Garden，最後仲放成條紅蘿蔔落個杯度，又幾得意。

睇到呢度，可能有朋友會問，咁同mocktail有咩分別？開飯仔都問過呢個問題，負責人解答話mocktail落嘅糖分比較多，呢隻無酒精「酒」就相對健康啲，主要都係配襯花香同水果嘅用料咁。

香港仲有邊度有得飲：

零售商：HK Liquor Store、The Bottle Shop
餐廳及酒吧：PDT、The Pawn、Foxglove、Buenos Aires Polo Club、Dr. Ferns、Happy Paradise等

文、相：Kar