之前喺西營盤經營「請坐」嘅兩位台灣媽媽，Grace同Tracy即將喺中環開新店「吃什麼」，大家最掛住既牛肉麵、蛋餅，同各式台灣小菜小食都應有盡有！
 

Tracy（左）同Grace（右）繼續拍住上

重用8年前一齊賣台式便當既店名「吃什麼」，Menu選擇變得更豐富，不變既係依然由兩位嚟自台灣，因為結婚生子而移居香港嘅Grace同Tracy主理。新店星期一(27/8)中午開始試業，星期四(30/8)正式營業。
 

必食招牌菜！

外省牛肉麵（牛腱）（$85）

湯頭香料味道濃郁，口感滑而帶少少厚，秘訣就係用台灣嚟嘅滷包，再加現磨花椒、醬油、蔥、薑、米酒同最重要既牛孖筋！咁就可以避免一般用牛骨熬湯會油膩嘅缺點，又帶出濃厚嘅味道。湯底帶辣，怕辣嘅話可以揀紅燒湯底。
 

牛腱非常入味，肉同筋比例亦啱啱好，兼具膠質同牛肉嘅咬口。保持經典嘅台灣風味之餘，兩位媽媽都有繼續嘗試改良，好似菜脯就比之前嘅乾身，口感更好賣相亦更吸引。
 

肉鬆蛋餅（$45）

大家最愛嘅蛋餅亦有供應，肉鬆特別挑選自家炒製，再由台灣空運到港，肉香突出，唔死鹹而且夠乾爽。蛋餅亦係用台灣蛋餅皮加兩隻雞蛋煎成，軟Q又有蛋香。最後淋上醬油，係幸福嘅寶島味道啊！
 

滷肉飯（午市小碗 $42）（晚市 $68）

細細碗最啱女孩子們淺嘗，半肥瘦滷肉既有脂香亦有滷水味，口感鬆化，齒頰留香。而且滷汁嘅甜鹹味加上少少豬油香，送熱辣辣嘅白飯當然一流！
 

惹味台式小食

鹹酥雞（$48）

有睇我地之前專訪嘅朋友或者記得，兩位媽媽其中一個堅持就係用台灣人用開嘅雞胸肉，而唔係大部分香港人偏愛嘅雞腿肉嚟做鹹酥雞。雖然處理更麻煩，但就係Tracy堅持嘅台灣古早味。調味得宜而且即叫即炸，香味吸引，外皮香脆而食完唔口渴。
 

滷味拼盤（晚市 $45）

台灣夜市另一必食嘅滷味呢度一樣有！豆乾嚟自台灣，口感偏實相當入味；滷蛋相對味道較輕，可以食到蛋黃本身嘅香味；滷牛腱最啱各位牛魔王，糅合牛肉同滷水嘅香味；滷豬血糕口感帶黏咬落微彈，無血腥味適合配自家製辣椒醬。
 

特別推介

山蘇（晚市 $78）

台灣呢個寶島唔單止小食好味，山菜亦係特色之一。好似生長於地海拔山地嘅山蘇，菜梗爽口而菜葉非常滑溜。另外仲有爽脆嘅水蓮等選擇，食厭咗一般油菜嘅你不妨一試。
 

清香茉香綠茶（午市跟餐 $14，單點 $28）

知道大家想快啲嚟重溫兩位媽媽堅持嘅台灣味道，記得注意返午市同晚市Menu各有不同，例如午市會供應台式便當系列，每款便當都有三款每日唔同嘅時令配菜；晚市會供應更多唔同款式嘅台式小食，包括嘴邊肉、紅糟肉、宜蘭鴨賞等等。
 

吃什麼
中環雲咸街77號嘉兆商業大廈地下A號舖

試業時間：
8月27日（星期一）：12:00 - 15:00
8月28日（星期二）：12:00 - 15:00
8月29日（星期三）：12:00 - 15:00

正式營業：（8月30日起）
星期一至三：午市 12:00 - 15:00，晚市 18:00 - 21:30
星期四至五：午市 12:00 - 15:00，晚市 18:00 - 22:30
星期六：午市休息，晚市 18:00 - 22:30
星期日：全日休息

文、相、片：Cathy