香濃蝦湯抵港！呢間嚟自北海道札幌嘅拉麵店主打用甜蝦頭熬煮嘅蝦湯，加北海道味噌、醬油或鹽味，配搭出唔同風味嘅特色蝦濃湯。上環店係海外首間分店，仲有供應香港限定拉麵同小食，要試多幾次先試得哂呀。
 

緣屋 札幌元袓蝦湯拉麵1998年喺北海道札幌創立，喺東京亦有分店。創辦人以細細個媽媽用甜蝦頭煮味噌湯作為靈感，開始用甜蝦頭熬製湯底。上環店亦會跟足日本店嘅食譜，使用嘅蝦頭同蝦湯都從日本直送，甜蝦頭會喺店內烤焗以帶出蝦香。
 

元祖蝦濃湯拉麵

味噌蝦濃湯拉麵（$78）

最受歡迎嘅口味係蝦湯加上赤味噌，湯底飲落蝦香濃郁但又唔會過於霸道，亦會品嚐到味噌鹹中帶甜嘅味道，兩種味道平衡。餐廳選用中粗度曲麵，掛湯效果唔錯之餘，口感仲夠哂彈牙滑溜。
 

辣味噌蝦濃湯拉麵（$88）

而如果鍾意重口味或者刺激嘅人，就可以試呢款辣味噌湯底！雖然湯底顏色睇落幾紅，但食落辣味無想像中咁嗆，湯底亦唔係太辣。辣椒粒主要係帶嚟刺激感，做到香辣惹味。食完拉麵覺得唔夠侯嘅話可以再加返碗白飯（$10）撈湯食，大滿足！
 

焦香醬油濃湯拉麵（$85）

除咗味噌之外，仲有醬油同鹽味選擇，而呢碗之所以取名焦香醬油，係因為廚師會用大火炒香肉粒、洋蔥等配料，再加入醬油作焦香處理。炒過嘅洋蔥同肉粒都會增加甜味，而焦香醬油亦令醬油嘅香味更突出，再加上蝦湯，味道層次豐富而香氣馥郁。仲會附上薑碎畀大家按自己口味加落去，增添風味。
 

緣屋原味味噌拉麵（$72）

香港限定！原味拉麵無加到蝦湯，味噌鹹香加上濃厚油脂嘅湯底，甚有北海道札幌拉麵特色。而且有按香港人口味調整，湯頭飲落濃厚但唔會太過油膩。
 

 
香港限定料理！

櫻花蝦唐揚炸雞（$43）

上環店新增咗幾款香港限定嘅和風蝦料理同小食，好似呢份炸雞就加入日本直送嘅櫻花蝦，口感外脆內嫩，櫻花蝦嘅淡淡蝦香加上多汁嘅雞肉，自私食完一碟都無難度。
 

炸日本赤蝦（$48）

鍾意蝦既朋友必點！將嚟自鹿兒島嘅原隻赤蝦炸至金黃香脆，每一隻都蝦香突出，配蝦湯拉麵更加惹味。
 

日本芝士薯餅（$22）

同樣都係香口小食，呢件薯餅嘅脆皮比較薄，主要係裡面軟腍嘅薯仔肉同半融芝士，仲加入麻糬增加煙韌口感，上面再用牛油添加香味。
 

緣屋 札幌元袓蝦湯拉麵
地址：上環干諾道中168-200號信德中心2樓228-230號舖

文：Cathy
相、片：Tom Li