鋸扒、食海鮮，邊個話晚餐先得？一個識錫自己，對自己好嘅人，午餐都一樣會食得豐富。位於荃灣藍巴勒海峽側邊嘅酒店，坐擁寬闊海景，幾間餐廳都有唔同嘅特色午餐，今日就介紹其中兩間畀大家去享受住先。

Café Circles （荃灣） 

樓底高嘅餐廳，通常都可以畀到人一種空間感同治癒感，位於荃灣酒店內嘅呢間西餐廳，正好就係例子之一，加上餐廳時尚嘅設計同開揚嘅景觀，絕對係lunchtime放鬆嘅好地方。餐廳近日推出多款午巿單點美食，有牛肉、亦有海鮮選擇。

焗波士頓龍蝦（半邊）配檸檬牛油汁及黑松露意大利飯

有別於一般嘅龍蝦意大利飯，啲意大利飯唔係散開晒，而係整整齊齊合成一條長方形狀，賣相特別亦令人留下深刻印象。龍蝦燒香至金黃色，肉質依然保持嫩滑彈牙。松露味道本身已經夠香夠突出，淋上檸檬牛油汁則有中和作用，多咗一份清新，少咗一份膩感。

慢煮紅酒牛面頰意大利粉

先以紅酒、香草等醃製過嘅牛面頰肉，再經慢煮兩個鐘處理，保留到大量肉汁，入味之餘口感又軟腍。師傅仲特意為咗客人可以啖啖都食到牛肉，將之切成粒狀。

焗咖哩牛脷飯配煎蛋

咖喱飯上枱時色澤金黃，加多隻煎到靚一靚嘅太陽蛋喺面，賣相吸引。大約用咗十款香料調製嘅港式黃咖喱，香而不辣，厚切嘅牛脷相當惹味，篤穿埋隻蛋，等啲蛋黃漿慢慢流埋入去，層次再昇華。

煙三文魚露筍溫泉蛋海膽汁意粉

幾樣食材配搭都咁吸引嘅煙三文魚露筍溫泉蛋海膽汁意粉，加入白酒調味，酒精煮完後雖然已被揮發，但依然有淡淡嘅酒香留低。師傅同樣為咗方便客人可以啖啖肉，就將三文魚切絲處理。而海膽汁亦刻意煮得杰身少少，令到意粉更容易掛汁。

鮑魚花膠石頭鍋湯飯

呢個石頭鍋湯飯認真大製作，又花膠又鮑魚落足料，舖到滿一滿。而要個湯熬到變白色，啲魚肉精華同鮮香出晒嚟，至少都要熬兩個鐘走唔甩，難怪咁清甜啦。

天空酒廊 （荃灣）　　

想要海景餐廳，唔一定要中環或尖東先有。荃灣呢間酒店靠近海邊，41樓嘅酒廊設有落地大玻璃窗，一樣可以俯瞰開揚嘅海景，黃昏時更可以欣賞到日落。餐廳主力供應午巿鐵板餐同下午茶。

美國安格斯肉眼扒 (220g)配薯條、法邊豆、甘筍、西蘭花及車厘茄

Lunch鋸扒一啲都唔過份呀，做得咁辛苦梗係要對自己好啲。只係加咗黑胡椒同鹽去調味嘅美國安格斯肉眼扒，近乎原汁原味，可以單純咁細味到香濃嘅肉味。當然亦加可按喜好淋上師傅特別以和牛肉調製嘅燒汁，增加層次。

香煎挪威三文魚配檸檬牛油汁 (220g)配法邊豆、甘筍、西蘭花及車厘茄

三文魚煎香後，再用慢火燴過，但依然都係保持半生熟嘅狀態。師傅解釋呢個製法可以令到三文魚暖身，但又唔會過熟，口感最滑就係呢個moment。不過有時三文魚食食下好易會有膩感，所以師傅亦特意調製咗檸檬牛油汁，酸酸咪咪又帶香味，最緊要可以中和返膩度嘛。

蒜蓉扒大蝦 (3件)配薯條、法邊豆、甘筍、西蘭花及車厘茄

蒜蓉扒大蝦係幾道鐵板菜式中，最受客人歡迎嘅一道。選用越南虎蝦，燒至微焦，仲開埋邊，一方面令到蒜蓉味更易滲入蝦肉，另一方面亦方便客人進食。蝦肉口感彈牙，啖啖蒜香。對於細食嘅朋友仔嚟講，lunch食三隻加薯條，份量啱啱好。

下午茶套餐

以法國經典朱古力品牌Valrhona為原材料嘅下午茶，鹹、甜點都加入咗朱古力製作。朱古力牛面頰漢堡，用黑朱古力汁煮過，微苦嘅朱古力帶出更濃嘅牛肉味；朱古力鵝肝凍批配紅酒啫喱，則選用白朱古力，再以紅菜頭調色將佢變成少女粉紅，既吸睛又甜心；煙鴨胸什菜卷亦掃咗層牛奶朱古力喺入面，味道較溫和。甜品方面，以係幾款唔同口味嘅朱古力慕絲蛋糕，包括有伯爵茶、熱情果同芒果等。

如（荃灣）

酒店當然唔止得西餐啦~ 呢間由名廚主理嘅中菜館，主打傳統廣東菜，供應多款精緻點心。無論係一家人嚟聚天倫，定係商務用餐都非常適合。

千絲鴛鴦帶子

賣相精美嘅千絲鴛鴦帶子，採用南澳帶子同蝦膠製作。師傅先用蝦膠包住帶子，再包絲，都唔少功夫㗎。炸至香脆後，可以點芥末沙律享用，帶子嘅鮮甜就更加突出。

遠年陳皮燉水鴨

注重養生嘅朋友，一定會鍾意呢碗湯品。採用20年陳皮、老雞、金華火腿、豬𦟌、水鴨同80頭日本元貝製作，用溫火燉4個鐘之後，就只係採取湯水同埋濃縮嘅精華，啖啖清甜。

生啫大鱔煲

大鱔唔易整，師傅巧妙地用上新鮮干蔥、生蒜子、薑片、蔥度同自製柱候醬調味，既能完全辟除腥味，亦令大鱔更入味。以砂煲燒至150度後，再落油炒香干蔥蒜子，最後將調好味嘅大鱔舖上面，冚蓋焗7至10分鐘。大鱔爽脆彈牙，香氣溢出。

海皇炒鮮奶

炒鮮奶係廣東名菜，呢度更將之混入海鮮製作！以鮮奶混合蛋白等配料，撈勻後以熱油冷鑊慢慢炒至凝固。呢度菜式要趁熱食啊，炒鮮奶嫩滑香口，配埋帶子等更見鮮香，送飯就最開胃。

芝士野米焗龍蝦

選用嚟自美國嘅波士頓龍蝦，先以岩米浸水30分鐘，再用大約180度油溫將龍蝦焗至7成熟左右，配上加入忌廉奶同拉絲芝士製成嘅龍蝦上湯，最後先放埋龍蝦上湯浸至全熟，令到龍蝦嘅鮮味同芝士奶香完全融合。

心動不如行動！有興趣就快啲約埋三五知己去嘆下美食！快啲bookmark定啦！

*以上圖片只供參考，所有食品以實物為準. 食品供應因餐廳而異