海洋公園唔係淨係得熊貓、海豚睇嘅，仲可以入去飲酒同食好西！第二年嘅歌酒節即將開幕喇，除咗多咗手工啤酒品牌進駐之外，亦有多個唔同嘅美食攤檔，提供即叫即製嘅小食。另外每晚都有唔同嘅音樂會，有機會聽到Dear Jane、RubberBand、Shine、陳柏宇等等嘅live呀！

唔講咁多，即刻睇有咩食先，中日韓台咩式都有！

台灣牛肉麵、蛋餅、香菇滷肉飯 @三星廚房

由藝人傅珮嘉主理，成檔都係做正宗台式嘢嘅，蛋餅有香腸、肉鬆等幾款餡揀。

即溶巴馬臣芝士卡邦尼意粉、德國脆爆鹹豬手 @Manecy’s  Studio Restaurant

芝士控行過見到成大嚿巴馬臣芝士喺度，對眼仲唔發光咩？將煮好嘅意粉放上去，用熱力熱溶啲芝士，係香口嘅。

冰極雪條（榴槤味、芒果味）@SO COCO

佢哋嘅椰子布甸大家應該都好熟悉啦，今次除咗有以往食開嘅甜品同生果碗外，仲有新出嘅雪條呀！係用新鮮果肉冷藏而製架，所以食落香甜又多汁！

生煎包、土匪雞翼     @正宗上海生煎皇

蒙古刈包 @Nomads

大蝦潛艇、德式熱狗    @Beerliner German Bar & Restaurant

話明歌酒節，當然有酒啦。

香橙雪條忌廉啤酒  @Heroes

飲開手工啤嘅朋友應該都認識呢間罐裝手工啤品牌，佢哋今次特地為海洋公園釀造咗款限定啤酒，係得呢度先有得飲咋！隻酒有啲橙味，似舊陣時嘅橙汁雪條味，幾易入口。

Beertail @掌門精釀啤酒

可能你分別都飲過cocktail同手工啤，咁beertail又飲過未先？佢哋研製咗4款beertail，喺呢度首賣！其中綠色嗰杯係以berliner wine加melon liquor再加vodka調製而成，飲落酸酸咪咪得嚟又幾fresh。當然都有on tap手工啤飲啦。

燒酹愛爾型啤酒、榴戀    @常陸野貓頭鷹啤酒

喺香港都增設咗釀酒廠嘅日本手工啤，有幾款期間限定或者首次op tap嘅啤酒。好似以亞熱帶粉紅番石榴香蕉口味加柑橘味嘅啤酒花釀製而成嘅榴戀咁，清新滑口。

Apple Cider @ 麥子

如果你已經飲過佢哋嘅葡萄柚、桂圓等味嘅啤酒，今次可以試下apple cider呀，果甜幾香架。

洋甘菊、洛神花‧黑莓  @大圍啤酒廠

喺釀製過程加入西方茶葉係佢哋嘅標記，就好似洋甘菊咁，花味突出，清新香甜。

無花果啤酒、Cacao Porter @8ozclub

呢幾款酒平時喺香港都好少見到，酒鬼有機會嚟到要試下。無花果啤酒真係加咗無花果汁入去，估唔到成件事又幾夾；而Cacao Porter幾順滑，黑朱古力、咖啡、焦糖香逐層滲出，好豐富。

台灣節氣啤酒   @OpenWine

白露係佢哋最新嘅節氣酒，新英格蘭式印度淺色愛爾型啤酒，唔好話香港，成個亞洲都好少有呢類型嘅釀製技術啊，微甘中帶有柑橘香。

Wine Pro Special   @香港葡萄酒專家有限公司

除咗啤酒，現場都有紅、白酒嘅，呢間主要都係提供嚟自法國嘅酒。

詳情
日期：3月10至11日、3月17至18日、3月24至25日、3月30至4月2日
（歌酒節為期四個禮拜，每個禮拜都有唔同嘅攤檔架留意返。）

文、相：Kar