又到咗一年一度蟹迷最期待嘅大閘蟹當造季節喇！今期搜羅咗六間有供應大閘蟹盛宴嘅餐廳畀大家，各位蟹迷 Ready 好未～

目錄

大閘蟹盛宴嚐味餐單 嘗申匯

主打上海同江浙地區嘅經典菜餚，由屢獲殊榮嘅主廚陳天龍主理，菜式於傳統嘅基礎上添加一絲現代風韻味。期間限定大閘蟹餐單選用太湖大閘蟹，多肉肥美，蟹膏如奶油般芳香。大閘蟹盛宴嚐味餐單包括蟹粉花膠羹，加入養顏花膠同蟹粉，係滿滿嘅蟹粉香，滋補又養顏；清蒸大閘蟹就最能食到蟹本身鮮味。蟹粉小籠包都不可錯過，以新鮮手拆金黃蟹粉及蟹肉入饌，每一啖都係蟹油香！

極上蟳味大閘蟹盛宴 如  

選用江蘇出產嘅上乘大閘蟹，將蟹融入多道經典粵菜菜式，蟹粉小籠包蟹黃香濃，肉質肥而不膩，一入口係滿滿啲鮮味湯汁；蟹粉蔥油拌麵都係其中一道亮點菜，以濃郁蔥油加上鮮甜油溢嘅蟹粉，每一條麵條都掛滿蟹粉，每一啖都係濃濃嘅蟹粉同蔥油香，層次豐富。另外套餐包括醉鮑魚、花膠筒螺頭燉湯及薑茶水中花等菜式。

大閘蟹燒乳鴿套餐 翠亨邨 

一份套餐就可以食勻大閘蟹同餐廳招牌乳鴿！大閘蟹燒乳鴿套餐包括兩隻四両主角清蒸大閘蟹，蟹肉鮮甜膏香，想再食好啲，可以加 $250 升級至六両蟹。蟹粉帶子炒飯都值得一試，炒飯粒粒分明乾身有鑊氣，帶子鮮甜彈牙，加埋蟹粉令味道更有層次。另有生拆蟹粉文絲豆腐羹、甜豆炒石班魚柳、蟹粉扒豆胚及招牌脆皮燒乳鴿，皮脆肉嫩。

秋冬大閘蟹宴 國金軒 

呢間名人飯堂今年首度推出秋冬大閘蟹宴，全部食材都夠晒矜貴呀。嚴選品質最肥美嘅上乘嘅 6 両大閘蟹作清蒸大閘蟹，唔使講都知肉厚蟹膏又鮮香。蟹粉玉珠澳洲龍蝦球都好推介，龍蝦球大大隻鮮甜爽口，配埋蟹粉簡直係鮮上加鮮。蟹粉炒千層雖然材料簡單，蛋白口感幼滑如絲，同蟹粉係絕配呀～

大閘蟹精選套餐 彤福軒 

同樣選用太湖嘅優質大閘蟹，以其溫和甘甜嘅口感同豐腴嘅油份聞名。精選大閘蟹菜式包括前菜蟹粉灌湯小籠包、老陳醋紫茄小刺參及蟹粉焗釀鮮蟹蓋，然後清蒸大閘蟹每隻約 8 両，簡單用薑同紫蘇葉蒸最能食到蟹嘅原味。砂鍋蟹粉花膠條燴飯都好有特色，以西式燴飯方式烹調中式料理，上枱時熱辣辣，蟹粉嘅鮮味滲晒入飯粒中，好出色！另外蟹粉菜式仲有蟹粉龍蝦脆窩巴及蟹粉煮茭白等。

大閘蟹蟹粉套餐 霞飛飛 

嚴選來自江蘇嘅正宗大閘蟹，以時令生拆蟹粉呈獻期間限定大閘蟹宴。大閘蟹蟹粉套餐將大閘蟹由蟹黃、蟹身到蟹腿逐一呈獻，首先有醉蝦、醉鮑魚、煙燻蛋及醬黃瓜四款開胃前菜展開序幕。然後可選鮮香濃郁嘅鮮拆蟹粉生翅或鮮拆蟹粉花膠海皇羹。再來有原隻清蒸大閘蟹（六両）、蟹粉芙蓉帶子蟹斗、清炒甜豆蟹腿河蝦仁及蟹粉扒豆苗。最後有皮薄爆汁嘅蟹粉小籠包，大閘蟹 Fans 一定唔會失望。

文: Yanica