最近有唔少台灣嘅餐廳同飲品店嚟到香港開分店，最新就有呢間喺台北開業以嚟一直都係打卡熱點嘅果汁店，主打用天然材料搭配水果打成嘅果汁、果昔同冰沙，唔少都有粉嫩或者漸層賣相，飲落透心涼之餘睇到心情都特別好！
 

嚟自台灣嘅花甜果室唔單止大受台灣人歡迎，飲品全部採用新鮮水果唔加任何色素。店主Lynn透露亦有唔少香港同日本遊客去打卡，所以第一間海外分店選址香港尖沙咀。希望提供一個畀大家放學放工後可以嚟放鬆嘅空間，同時亦令生活多一啲樂趣。
 

芭比情歸何處（$36） 

呢杯係台灣人氣No.1，用咗士多啤梨、藍莓、燕麥同鮮乳打成粉紅同紫色漸層。飲落係莓果嘅酸甜同牛奶嘅甜香，加上打碎咗燕麥嘅少少咬口，清爽唔膩。

咁呢杯飲品同芭比有咩關係？原來係因為佢地唔想改太普通嘅名，而當初見到呢杯粉嫩賣相嘅果昔就諗起Barbie，從而改咗呢個咁得意嘅名喇。
 

紐扣（$36）

呢杯係店主心水推介，裡面有覆盤子、甜蕉、鳳梨、蜂蜜、甜橙、Perrier氣泡水，最後再加食用花點綴，夠哂Fancy。飲落下層有一粒粒覆盤子果肉，配埋氣泡水Sparkling嘅口感，酸爽醒神。而上層就以香蕉味道為主。

呢杯嘅構思其實係嚟自台灣一位療癒系插畫家Dorothy當時嘅新書《紐扣》，因為本書同果汁店一樣，都希望令人放鬆同幸福，所以就合作推出呢杯果汁。
 

  

她，與他的香水味（$45） 

紫紅色嘅呢杯冰沙喺台灣店係唔少日本遊客嘅最愛，鮮艷嘅顏色嚟自紅肉火龍果，裡面再加蘋果、乳酪、蜂蜜同椰漿絲。飲落會有一粒粒火龍果嘅特別口感，果香同乳酪味道平衡，甜味適中，睇落幾大杯但要一個人飲完都無難度。

咁她或者他嘅香水味會令你諗到啲咩呢？呢個就係因為店主Lynn希望同大家有多啲Connection，見到香水味呢個名會有想象空間，諗下背後係咪有咩故仔或者味道。
 

抹茶森果之戀（$28） 

唔好以為只有女孩子先鍾意，Lynn話台灣唔少男生都鍾意飲呢杯用抹茶、蘋果同蜂蜜打成嘅果汁。飲落有抹茶幽香，不過略嫌回甘被蜂蜜甜味蓋過。勝在有蘋果同檸檬嘅果香平衡，整體味道都係清爽嘅。

另一款台灣男生最愛係用甜蕉、黑芝麻同鮮乳打成嘅嘿嘿芝麻甜蕉奶（$34），陪女朋友排隊嘅香港男士們不妨又試下，睇下你地口味一唔一樣喇。
 

尖沙咀店裝修同台灣店一樣，甚有簡約和風感，試業初期會跟返台灣店嘅基本Menu，台灣嘅新品例如櫻花淚、金娥東等等就會之後逐漸引入香港。

亦唔排除之後會有同香港藝術家合作，或者推出香港限定飲品。而Lynn最後亦劇透，之後台灣同香港店都會推出一系列「似甜品嘅果汁」，大家不妨密切留意。
 

花甜果室
尖沙咀加連威老道52號嘉蘭大廈地下C號舖

文、相、片：Cathy