大家又少個藉口飛台灣一轉，因為台灣一間知名滷味店嚟到香港開分店！貢丸、百頁豆腐、米血糕、甜不辣、鴨翼等滷味唔洗等到去台灣夜市，仲有埋台灣店都無嘅滷肉飯，以後掛住台灣又多一個好去處！
 

頂好香用嘅秘製滷水由台灣空運到港，保證香港店同台灣店食到嘅係同一款味道。鹵水汁深啡色香噴噴，鹵水味道惹味得嚟帶少少甜，唔會鹹到食唔到食材原味，啱哂香港人口味。
 

而且大部分食材一樣由台灣直送，部分先滷煮入味，客人點單後再以滷水加熱。
 

必食5大推介

百頁豆腐（未滷）（單點$10/份）

百頁豆腐特色之一係之餘仲非常索湯汁，口感比普通，最啱重口味人士。
 

貢丸（單點$10/份）

特別選用豬肉貢丸而唔係加入冬菇嘅貢丸，食落更彈牙更有Q勁！
 

鵝腎（單點$10/份）

香港店獨有，其實係對應返台灣店嘅鴨腎，爽口入味唔過鹹。
 

黑輪（未滷）（單點$10/份）

黑輪主要材料係台灣特產之一虱目魚，口感同甜不辣差唔多，香軟彈牙。
 

素腰花（單點$10/份）

另外仲有一系列素食滷味，好似素雞、素豬肚、芋粿等，當中最受歡迎嘅就係素腰花。素腰花用蒟蒻製成，切好花紋後再放入滷汁，入味之餘口感非常彈牙。
 

Lunch抵食之選

招牌滷味套餐（$46/份）

午飯時間唔少人會嚟買套餐，可以自己揀三款滷味再搭時蔬同白飯或烏冬，烏冬一樣用滷汁嚟煮㗎。每碗都會加酸菜、台灣香油、特製秘製滷汁，可以再按自己口味加秘製香辣油。辣油香味十足，同滷味香配搭起嚟更有相得益彰嘅效果，小心拎返辦公室會引嚟一班同事想黐食！
 

頂好香滷肉飯（$38/份）

滷肉飯更加係香港店獨有！用嘅一樣係台灣頂好香嘅滷水配豬肉同茄子，肉醬口感鬆化味道鹹香有致，配多隻滷蛋撈飯食，話都無咁易就食完一碗。
 

最後溫馨提示一句，想試哂咁多款記得盡早去，好似開飯仔下晝兩點到訪就已經食唔到米血糕喇。而且所有滷味都會再以鹵水加熱，繁忙時間請大家畀多少少耐心等候啊。
 

頂好香
（中環店）中環利源東街地下21號舖
（黃埔店）紅磡黃埔新天地第5及第6期地下及地庫Aeon Style

文、相、片：Cathy