講起台灣菜，你第一時間會諗起咩？魯肉飯？珍珠奶茶？定係麻辣火鍋？愈諗愈多，愈諗愈餓，咁就唔好諗咁多啦，即刻去搵食啦！香港都有唔少台灣料理，今日就同大家介紹其中兩間。
去過台灣嘅朋友，實有去過大稻埕，喺港口邊踩下單車，逛下巿集……呢間餐廳正正以呢個景點為靈感，取名稻埕飯店，裝修富有台灣色彩，另外亦以台灣直送台稉米同滷水醬埕作概念，製作菜式，為香港人帶嚟回憶中嘅台灣味道。另外值得一提嘅係呢度採用電子落單，重有部貓喵自助送餐機，有夠CUTE呢。
鵝不是鴨肉
說穿了即係滷水鵝片，白滷水汁以古早秘方浸製，選用十幾款材料精熬而成，師傅仲特地過咗去台灣學配方架。白滷水冇黑滷水咁鹹，清新啲，能夠帶出食物嘅原味多啲。鵝片肉質細嫩，陣陣肉香。
滷肉台稉米飯
看似簡單嘅滷肉飯，其實都相當講究。米係選用台灣直送嘅台稉 9 號米，米粒透明飽滿，帶有黏性，秘製滷肉嘅汁滲晒落去，啖啖油香。橙黃色嘅溏心蛋絕對係畫龍點睛之作，生熟度剛好，滿滿蛋香。
滿滿骨膠原豬手
想要靚靚嘅女士，成日都要補充骨膠原。呢道豬手就啱晒喇，膠原蛋白夠晒多，肉質雖厚但軟腍，燘到入晒味，幾好送飯。
黑糖珍珠舒芙蕾班戟配抹茶冰淇淋
我都唔想用邪惡去形容呢個甜品，但當上到枱面，望住佢大大份，勁多cream，重有黑糖漿同黑糖珍珠，真係冇法子唔話佢邪惡。不過咁喎，愈邪惡嘅嘢通常愈好食，舒芙蕾班戟厚身，口感軟身但實淨，珍珠煙韌，啲cream就好軟滑，而且冇想像中咁甜膩，原來係師傅自己打發嘅，冇加到糖，同朋友share嘅話都可以放心食。另外有抹茶蕨餅同雪糕伴碟，作為飯後甜品相當豐富。
米水系列
介紹完邪惡嘅嘢，當然都會介紹返啲健康嘢畀大家啦，冇咁大罪惡感嘛。飲品建議可選米水，有熱有凍，都係以台中直送台稉 9 號米煲煮 15 分鐘而成，有助改善食慾、強健體質等。原味純米水色澤濃濁，帶有濃濃米香。另外草莓優格米水則以真‧士多啤梨果肉打成醬，加原味yogurt製作，呢個米香味就相對淡啲，不過有果肉食到都幾開心。
打邊爐無分季節，想打就打。呢間人氣台式任食火鍋店提供9種正宗台灣鍋底，全部都係以全天然食材製作，建議大家可以落料打邊爐之前，先飲飲個湯呀！另外，餐廳提供多款牛肉種類同埋台灣直送食材選擇，設有自助火鍋配料區、醬料區同飲品區。
藥膳牛蒡鍋
愈嚟愈多人鍾意藥膳湯底，養身嘛。呢個藥膳牛蒡鍋以先燒後燉嘅牛腿骨熬製，配新鮮牛蒡同多種名貴藥材，仲有芫荽添！湯底味道清甜，營養價值仲十足！牛蒡有降血糖、血脂等功用，兼且可以瘦身添，女士們聽到是咪蠢蠢欲動先？
牛大人紅燒牛骨鍋
同樣都係以先燒後燉嘅牛腿骨熬製而成，散發住陣陣濃郁嘅燒牛骨香味，濃甜可口，牛骨湯底再淥埋牛肉，牛味濃到呢~絕對係牛魔王嘅首選。加上慢燉烹煮可以釋放到牛骨內嘅營養物質，做到熱量低而蛋白質豐富。
牛夫人秘方麻辣鍋
呢個湯底就專為麻辣控而設啦，以辣乾、大紅袍花椒、郫縣豆瓣同三十幾種中藥材，加埋先烤後煮嘅牛骨熬成，相當足料。難怪味道既有牛骨嘅清香，而又不失層次多變嘅麻辣香，收尾仲有回甜添。辣度設有大、中、小辣揀，夠晒彈性。
台灣鳳梨雞鍋
講到台灣嘅經典古早鍋，就要數到台灣鳳梨雞鍋喇。以鳳梨搭配苦瓜熬製嘅雞湯，味道清甜帶微酸，苦味反而冇乜喎，值得一試。
牛媽秘製滷鴨舌
多款火鍋配料均由台灣直送，特別推介秘製滷鴨舌，以最傳統嘅方法製作，先汆水、後過河，再加入台灣秘製嘅滷水配料一齊烹調，非常入味，肉質爽滑彈牙。
心動不如行動！有興趣就快啲約埋三五知己去嘆下美食！快啲bookmark定啦！
*以上圖片只供參考，所有食品以實物為準. 食品供應因餐廳而異