家有毛孩嘅朋友注意！大埔新開一間動物友善餐廳，唔單止有哥基店長坐陣，仲有供應寵物餐牌畀毛孩們食鮮食。各位毛孩主人亦可以食各式輕食同All Day Breakfast，特別推介Deluxe版本，豐富到兩個人Share食都夠呀。
 

哥基店主來福

Buzz Grill Bar & Cafe係動物友善餐廳，歡迎大家帶埋自己嘅毛孩嚟探哥基店長來福！夜晚六點前供應西餐，六點後就主打串燒。最特別嘅係有寵物餐牌，用新鮮食材製作畀毛孩食。
 

自家製寵物烘蛋（$32）

寵物無穀物飯糰（$32）

烘蛋用雞蛋、薯仔、鴨肉、三色椒、西蘭花製成，成塊咁畀狗仔食都得。而飯糰其實係三文魚同鴨肉，肉碎方便年紀較大無牙嘅毛孩食。所有都係人都可以食嘅有機、無激素食材，所以絕對可以放心畀毛孩食。
 

賓尼迪蛋（$68）

輪返畀各位毛孩主人食嘅西餐啦，賓尼迪蛋嘅水波蛋淋上荷蘭醬汁，下面就有煙三文魚、巴馬火腿、煙肉同薯餅，切開蛋黃有流心效果，點蛋汁食特別惹味。
 

 

（左）有機百花茶（$58），（右）Buzz Deluxe Breakfast（$126）

All Day Breakfast有兩個版本，Deluxe主角係少見嘅烤牛骨髓！加麵包糠焗完特別香口，配多士食一流。煙三文魚芝士焗大啡菇亦夠足料，煙三文魚嘅鹹香同多汁嘅大啡菇好夾。仲有雞扒、炒蛋、煙肉、豬肉腸、豬柳漢堡扒、芝士薯餅，如果兩個女仔嚟點一份Share食都好飽。
 

焦糖朱古力芝士蛋糕（$68）

甜品就以蛋糕為主，焦糖朱古力芝士蛋糕口感柔滑，上層海鹽焦糖嘅鹹甜平衡有致，又唔會蓋過朱古力香味，如果再大件啲就更好喇。
 

唔少客人都會帶佢哋嘅毛孩嚟，一齊開餐

Buzz Grill Bar & Cafe
地址：大埔東昌街6-16號東昌閣地下D號舖

文：Cathy
相、片：Calvin Kwok