啟德呢間以親民價為賣點嘅日式燒肉店，係日本燒肉專門店「牛角」嘅全新副線，午市燒肉套餐$48起就有交易，即使係全日定食亦只需$68起，仲配埋珍珠飯、味噌湯同是日前菜，當中最抵食嘅套餐，牛肉平均只係$35/100g！如果想食得考究啲，可以自己拼配肉類同醬汁𠻹～

套餐同單點肉類都設有分量選擇

超值之選

黑白胡椒牛五花定食（$158/450g）

餐廳為咗讓大家試到最佳口味配搭，所以按最夾嘅組合設計餐牌，但下單時仍然可以更改成你想試嘅風味。而8款醃肉汁之中，有5款係呢個新品牌限定，包括山葵汁、黑白胡椒燒汁、威士忌燒汁、韓風辛辣，以及花椒孜然。

當中最重量級嘅款式「黑白胡椒牛五花定食」設有450g，肉片堆成小山咁，視覺都幾震撼，男士絕對夠飽。牛五花嘅脂肪比例約為1:1，若燒耐少少逼出多啲油分會更香口。

單點推介

黑松露月見黑毛和牛燒（$88/$50g）

呢款肉質最軟嫩

值得一提嘅係，任何單點燒肉加$26都可以變成套餐（配珍珠飯、味噌湯、是日前菜），方便你DIY個人化口味。其中最推介嘅係黑松露月見黑毛和牛燒，配上黑松露月見汁令和牛更加香滑。

牛舌配香蔥辣油（$56/50g）

夾起時要小心醬料滑走

牛舌則提供兩款口味，包括香蔥辣油同秘製蔥鹽，細心之處係牛舌同醬料分上，鍾意幾濃味都可以自己掌握。薄切牛舌燒起嚟幾爽口，而香蔥辣油按相中分量唔會過辣，好惹味。

牛小排配威士忌燒汁（$58/50g）

限定醬汁之中，開飯仔覺得威士忌燒汁最特別，同牛小排都好夾，酒香滲入肉片可以解少少油膩感，而且唔會蓋過肉味，味道幾特別。牛肉以外則推介大家試雞爽肉配韓風辛辣汁，肉質爽口，醬汁鹹辣度調得啱啱好。

升級配搭

特色飯可以跟餐升級（+$8起）或單點（$22起）

牛角飯係品牌嘅一大特色食品，而呢度就有更多選擇，好似香蔥辣油玉子飯、溫泉玉子飯、櫻花蝦鰹魚紫菜飯等，配料好充足，撈勻都啖啖有料。

番茄味噌海鮮湯（+$16）

套餐嘅味噌湯可以升級轉款式，例如似平凡嘅番茄味噌海鮮湯，一𢳂湯就見到八爪魚肉、帆立貝、豆腐等，非常足料，加上明顯嘅番茄味，清新鮮爽又開胃。

味噌田樂燒茄子、蜜糖芥末煙肉薯（各$22/份）

另外亦有單點前菜、燒物、日式料理等，如味噌田樂燒茄子、蜜糖芥末煙肉薯、醬煮豬軟骨、芝士雞軟骨漢堡等，男女老少都啱食，做佐酒小食亦得。

牛角J
地址: 九龍城啟德承啟道38-39號啟德體育園啟德零售館2 3樓M2-301號舖

文、相：Cathy
片：Cathy、Tom