喜茶由上年聖誕進駐香港到而家，熱潮依然未有退減，分店仲愈開愈多，嚟緊元朗同荃灣都又有新店開業，同以往一樣，新店開業首日設買一送一優惠，粉絲記得Mark實日期啦。而內地推出咗一段時間嘅新飲，多肉粉荔，香港亦終於有得飲啦。

唔使開飯仔多講，各位粉絲都知道佢哋不時按季節當造嘅生果嚟推出期間限定，呢期嘅限定新品就係多肉粉荔啦！粉紅PINK PINK色好鬼靚，打卡是常識吧。除咗大家熟悉嘅綠妍茶底外，呢款新飲仲可以揀特別定製嘅玫瑰青茶底（係得呢款飲品先有呢隻茶底配咋）。玫瑰青茶飲落花香味突出，同清甜嘅荔枝香好夾，要少少甜都已經夠晒甜。大啖飲，仲可以啜埋荔枝果肉同蘆薈粒粒添，好有咬感。

開始感受到夏天嘅節奏時，揀嘢飲都可以試下啲refreshing啲嘅，滿杯金菠蘿同芝芝莓果都幾啱feel，前者超甜解渴，後者微酸小清新。

 芝士金鳳茶王

最啱些牙榮嘅Mini喜茶都換咗新裝，樽蓋一啪開就可以插飲管，比舊裝更方便。

喜茶每間店嘅設計都各有特色，唯一嘅共通點就係間間都好有藝術概念，好啱打卡。元朗店以「人在草木間」為靈感，利用光影嘅裝置藝術，令到客人有種喺樹蔭下品茶嘅感覺，而且，呢間店仲設有戶外空間，可以感受真‧在草木間呀。至於荃灣店則呈現「竹裏山巔」嘅意境，設有半高屏風、仿草蓆座，就好似喺茶亭飲茶一樣。

喜茶
元朗店地址：元朗元龍街9號形點1期1樓1091號舖
開業日期：5月25日

荃灣店地址：荃灣楊屋道1號荃新天地1期UG樓78號舖
開業日期：6月1日

文、相、片：Kar