係時候睇定團年飯、開年飯食咩好喇，想舒舒服服又試到特色菜嘅話，可以考慮私房菜館，以下5間推介有fusion口味、2人起私房菜套餐等選擇，即睇邊間啱你需要～
中西Fusion私房菜 大同私房菜會所 
圖：phonebus
團年飯食中菜好基本？不如試吓中西合壁～尖沙咀一間由廣州「大同酒家」後人創辦嘅私房館，菜式設計融入負責人自身周游列國嘅烹飪心得，炮製蜜汁火方、大蝦多士等傳統料理外，亦有法式橙鴨、炸芝士火腿牛扒、甜點紅酒煮提子伴Bailey Ice cream等加入西、日元素。另外獨立房間更設有卡拉OK，啱晒同一眾親朋好友齊齊過年。
廣東功夫菜 睿私房菜
圖：Koey.hsu
銅鑼灣一間以正宗廣東菜作招徠嘅餐廳，由鑽研中菜逾20年嘅潘師傅掌舵，炮製唔少功夫菜。好似睿家鄉釀原條鯪魚，將原條鯪魚起骨、拆肉而完整保留原塊魚皮，再釀入餡料，絕對係一道心機菜。另外秘製酒香鮑魚，選用新鮮鮑魚配上獨門酒香汁，鮮味彈牙又帶點酒香，做前菜大方得體。
創意配搭新口味 榮哥廚房私房菜
圖：設計精緻又可以2人起嘅私房菜，啱晒新年想食中菜撐枱腳嘅朋友仔。除咗招牌茶王燻雞呢類傳統粵菜，亦融入環球食材同現代烹調手法，設計充滿新意嘅創意料理，例如手打蝦肉釀鑽石蜆、Iberico黑毛豬火腿炒蒲田米粉、慢煮海黃花配普寧豆醬伴黑魚子等，將傳統菜式嚟個大變身！師傅亦唔會拘泥於特定口味，好似時令甜品就曾經推出花奶凍熊仔冰仙草凍，打卡啱晒。
傳統順德私房菜 名門私房菜
圖：順德菜唔少菜式以魚鮮入饌，係唔少海鮮控鍾意嘅菜系。而呢間順德私房菜館，可以揾到蝦乾魚肚大芥菜煲呢類清潤菜式外，亦有加入大大隻肉蟹嘅高級版糯米炒飯、滋補嘅花膠海參羮等料理。如果想食功夫菜又應吓節，順德煎釀鯪魚就啱你喇，「年年有餘」夠晒意頭，長輩都一定鍾意。
粵式私房菜館 御膳
圖：足料夠鑊氣！呢間私房菜館都有2人起嘅套餐，組合亦比一般私房菜館多，照顧唔同客人口味之餘，價錢亦豐儉由人。較多人推介嘅花雕雞油蛋白蒸大肉蟹、胡椒炒大肉蟹各有各滋味；而肉食控可以試試台山菜花啫西班牙豬髀肉，椰菜花吸收豬髀肉嘅精華，入口鹹鹹香香，好啱佐酒。而家提前訂座，重可以用特惠價嘆即叫即燒嘅招牌玻璃乳鴿𠻹。
文：Cathy
