世界盃就快開始，除咗出街同朋友一齊睇波隊酒之外，便利店準備好幾款睇波必備嘅零食，仲有深夜醫肚嘅宵夜，加埋日本直送嘅甜品畀陪睇嘅女友，喺屋企都可以食好嘢！

為慶祝世界盃，Lays薯片特別同足球名將美斯合作，推出世界盃特別版薯片，分別有紫菜、薄餅、辛辣、瑞士芝士4款口味。係粉絲嘅話梗係要買嚟撐下場啦！

薄餅味薯片味道偏濃，好惹味，好啱深夜口痕嘅零食友。

卡樂B薯片最近亦推出期間限定嘅日式芥末味薯片($13.5)，V Cut厚切嘅薯片香脆無比，加埋wasabi嘅微辛口感，絕對係提神item！

喜愛挑戰新零食嘅話，不妨一試百邦嘅杯裝特濃朱古力薯片($15)，喺厚厚嘅波浪形薯片上面，有濃郁嘅朱古力醬，既鹹且甜，好有層次感架！另有牛奶朱古力口味選擇。

女友必like！

女友雖然乖乖陪睇，但識做嘅男友們當然要識做，畀啲「甜頭」呢！以下由日本直送嘅便利店甜品就啱晒，好似呢款北海道鮮忌廉瑞士卷($12)，以日本雞蛋及麵粉製成嘅蛋糕、加埋北海道牛奶製造嘅鮮忌廉，口感鬆軟又滑溜，正！

如果你有個抹茶控女友，一定要買呢款西尾抹茶十勝紅豆銅鑼燒($12)，以兩塊金黃色班戟包住日本名古屋「西尾抹茶」做成嘅忌廉，以及北海道十勝紅豆，微甜又有口感。

至於賣相低調嘅焙茶黑蜜大福($12)，表面鋪滿焙茶粉，內裏有焙茶忌廉以及流心嘅黑蜜，加埋煙韌嘅大福，口感好light。

飽肚之選！

睇波睇到深夜，有時都會想食啲飽肚嘢墊胃，便利店最近新出幾款7-SIGNATURE冷麵系列，賣相似乎唔錯。呢款煙鴨胸冷烏冬好豐富，有煙鴨胸、雞絲、火腿、蛋絲以及漬物，烏冬更附設特製醬汁及wasabi醬，微辛感足以支撐球迷睇埋下半場，試食價為$20。

另一款雞絲火腿蕎麥麵更是高質之作，蕎麥麵係從日本長野縣生產，再配以雞絲、火腿、蛋絲及漬物，食落更有口感，好啱肉食男生們。試食價為$20。

健康零食！

夜媽媽，唔想要邪惡零食？得，開飯仔推介Nature Valley新出嘅蛋白質條，一條有10g蛋白質，而且不含麩質，健康得嚟又好味！口味有花生醬黑朱古力、鹽味焦糖果仁兩款，價錢為$10.5/條、$44.9/盒。

銷售點：7-Eleven便利店
注：一切以店舖售價為準。

文：Joy