有時放工想搵個地方chill下，飲返杯酒relax下，除咗中環、尖沙咀等旺區，喺大角咀都有間高質小店。唔好睇佢地方細細嗰300呎，但都有8個tap頭，local定外國嘅酒款都有，而且腦細同價錢一樣咁親民~
呢間小型taproom勝在入夜後好有氣氛，腦細同員工都會主動同客人傾偈，介紹酒款，以酒會友。最初開業時本住支持本土製造嘅諗法，8個tap頭全部都係local手工啤酒嚟嘅，但喺傾偈嘅過程中，發現唔少客人都鍾意試下外國嘢，於是就加入咗啲外國酒款喇。無論係IPA、stout定係酸啤，甚至cider等等，都可以喺度搵到，酒款輪流轉換，每次嚟都一定有新嘢飲~
當然，嚟到嘅話必試呢度嘅House IPA啦，係腦細自家釀製，出面飲唔到㗎。呢款係Session IPA嚟，採用Citra同Columbus啤酒花做酒底，好易入口，一飲落去就會飲到好清香嘅酒花味，而且愈飲仲會愈香添~ 唔太澀口之餘兼有微甜麥芽香，呢排天氣咁熱飲就爽晒，就算係手工啤酒初入門嘅朋友仔都好啱飲。Once you go craft，意思就係當你一試過手工啤酒之後，就會發現到佢嘅魔力，返唔到轉頭啦科科~
呢度有嘢食㗎都，以佐酒香口小食為主，特別推介炸雞軟骨！炸至香脆嘅雞軟骨，點埋蒜味蛋黃醬，鹹香惹味，係會令人食完一粒不自覺又要放第二粒入口，送酒一流。
芝士控嘅話就揀芝士肉丸啦，用咗巴馬臣同車打芝士兩款芝士製作，又幾香口。
要飽肚嘅話，就有漢堡同埋egg benedict。前者材料睇落簡單，都係漢堡加蕃茄加芝士加生菜咁，但塊漢堡，係自家手搓牛肉嚟，仲預先加入蛋同黑椒等調味，食落鬆軟又juicy。後者則使用鴨蛋，令蛋味更香。而且，面頭淋嘅荷蘭醬都係自家打製㗎。
Once You Go Craft
地址：大角咀博文街24號地舖
文、相、片：Kar