中式元素一定老土？未必！太子呢間Cafe由幾位90後開設，以白底藍花嘅青花瓷做主題，貫徹主題嘅裝修加上港式Fusion菜式好有新鮮感。而且食物有Gimmick得嚟又有質素，用蒸籠上枱嘅All Day Breakfast加上煙燻香氣，Bagel特別搵網店訂造口感軟Q，值得一試。
 

青花亭位於太子港鐵站附近，純白色店面非常易認，裡面裝修擺設就以藍白色為主，古典得嚟唔俗氣。主打港式Fusion菜、咖啡同貝果，部分菜式亦特別設計為藍白色，最啱打卡呀。
 

大蒸籠早餐（$148）

唔少女士們嚟到必點嘅招牌菜，放喺蒸籠裡面再用蘋果木煙燻，打開有白煙飄起，色香味當中就已經先滿足咗視覺同嗅覺。早餐當中有黑松露炒日本雞蛋、煙肉、薯餅、大啡菇等。除咗炒蛋因為黑松露醬已經夠香之外，其他食物都增加一陣煙燻香味，味道亦有水準。
 

黯然銷魂貝果（$88）

見到「黯然銷魂」呢四個字，相信係香港人嘅話應該唔難估到餡料係叉燒蛋。貝果係向香港一間網店訂貨，存貨唔多，保證貝果新鮮度。食落果然口感夠煙韌，外Q內軟。而貝果裡面嘅叉燒選用人龍燒臘店齒留香嘅出品，肥瘦適中，帶淡淡玫瑰露香氣。
 

意式精選海鮮皇意大利飯（$258）

一上枱就聞到好香蝦味！雖然價錢唔算好平，但見到啲北海道帶子、三文魚籽、大蝦、蟹肉、大花蛤鋪滿到見唔到啲意大利飯，就知道係物有所值嘅。
 

刺身級北海道帶子大大粒，厚肉而味道鮮甜，三文魚籽粒粒喺口腔爆開，口感刺激。值得一提係呢度嘅意大利飯係正宗al dente口感，食到米芯有少少硬唔好以為未煮熟呀。
 

 

鮮果乳酪（海灘）（$78）

近年大熱嘅Yogurt Bowl有唔同口味選擇，呢款海灘就用原味自家製乳酪加蝶豆花染成藍色，襯返哂個裝修！原味乳酪酸中帶微甜，配埋Granola同莓果食感覺清新。
 

（左）蝶豆花白桃乳酸梳打（$52），（右）凍奶蓋鮮奶玫瑰抹茶（$50/凍，$46/熱）

同樣藍白色嘅飲品其實係蝶豆花汁加白桃乳酸梳打，漸層搶眼之餘攪勻會變成夢幻淺紫色。而鮮奶抹茶選用日本小山園抹茶粉，口感柔順而且回甘突出。自家製奶蓋亦相當厚滑，配乾玫瑰花瓣增添香味。
 

青花亭
地址：太子荔枝角道113號五華樓地舖

文、相、片：Cathy