想快手買份輕食，但又已經食厭咗一般咖啡店嘅嘢食？港鐵南昌站附近就搵到呢間新開嘅咖啡店，供應即叫即烤嘅足料三文治，飲品亦有港式奶茶、鴛鴦等唔同選擇，最啱早餐或者Tea Time！
 

Cha:fe呢個店名有「茶啡」嘅意思，結合港式奶茶同精品咖啡嘅概念，希望帶奶茶同鴛鴦呢兩款飲品跳出茶餐廳嚟到咖啡店！而唔少人鍾意食返份三文治配奶茶，所以呢度亦供應烤三文治，用鐵板即叫即製。
 

黑松露炒蛋烤三文治多士（$32）（加芝士+$4）

方包加上牛油，同配料一齊放到鐵板上加熱，加上生菜同秘製醬汁，頗有近年大熱韓式吐司嘅風格。炒蛋唔算非常嫩滑，但黑松露醬香味濃郁加晒分。白色嘅秘製醬汁味道酸酸甜甜幾開胃，加埋芝士味道就更豐富。
 

腿蛋烤三文治多士（$28）

簡單啲嘅腿蛋配搭同樣唔錯，醬汁落得夠爽手，秘製醬汁、茄汁，加埋蔬菜無論口感定味道層次都夠豐富。而且方包烤過後帶牛油香又夠脆，就算開飯仔影完相再慢慢食，方包都無變腍到。
 

朱古力奶茶（$32/凍）

即係奶茶版嘅Mocha，最抵讚嘅係餐廳選用唔會太甜嘅朱古力，入口先係奶茶嘅醇香，之後先係嘅朱古力香甜。奶茶茶底選用唔同品種茶葉配搭，煲滾後會再人手撞茶，確保壺裡面嘅茶濃淡味道均勻，而煲好嘅每壺茶只會用一個鐘！茶香突出，配埋黑白淡奶，的確幾有港式奶茶風味。
 

 

厚奶咖啡（$38/熱飲大杯）

即係大家飲開嘅Caffe’ Latte，House Blend咖啡豆混合巴西同哥倫比亞兩地100% Arabic咖啡豆，用日式烘焙方法令咖啡香味濃厚，同一時間減少果酸味，更易入口。所以咖啡聞起嚟有烘焙香，但飲落唔會有苦味或者酸味，口感柔滑順喉，帶少少牛奶甜味。
 

經典鴛鴦（$40/凍）

有奶茶有咖啡又點少得鴛鴦呢？因為餐廳House Blend咖啡酸味低，同港式奶茶更夾。味道方面就以咖啡味比較突出，加返少少糖漿奶茶味就會帶返出嚟。濃郁提神。
 

白桃梳打（$32）

除咗咖啡、奶茶、鴛鴦呢三大類，呢度仲有朱古力、梳打、沙冰、鮮檸檬飲品等選擇，呢杯白桃梳打就有天然漸層，打卡見到特別透心涼，白桃甜味加上氣泡口感亦非常消暑。
 

Cha:fe
地址：深水埗深旺道28號V Walk地下G-25號舖

文、相、片：Cathy