港式經典菠蘿油 金華冰廳
![](https://www.openrice.com/userphoto/Article/0/2J/000I411A9BB5CF97840E67j.jpg)
圖:Voracious,piggyz
雖然應該係唔少吃貨「細細個就聽過嘅名」,不過循例都要介紹下嘅。太子呢邊嘅老字號冰室嚟講,佢地認第一應該無其他人敢認第二。最出名嘅一定係唔少港人同遊客都慕名而嚟嘅菠蘿油:新鮮出爐熱辣辣嘅菠蘿包再夾塊凍牛油,一熱一凍一脆一滑,配多杯茶走真係無得輸。趕時間嘅話外賣個菠蘿包食亦得,得咗。
抵食新派點心 籠太子點心專門店
![](https://www.openrice.com/userphoto/Article/0/2J/000I42CC9D19DBF4432E1Fj.jpg)
圖:小美冰琪琳
港式美食除咗冰室,仲有酒樓裡面嘅一盅兩件。呢間點心專門店就新舊兼備,既有大家食開嘅蝦餃燒賣,亦有唔少創意點心。例如海皇芝士千絲卷賣相就已經夠吸睛,炸到脆卜卜嘅麵絲入面係惹味芝士醬同彈牙蝦肉,配搭得宜。另一得意點心叫「不是炸兩」,咬落就發現腸粉包住脆脆、蝦膠同西芹,無論口感定味道層次都比真·炸兩豐富。
地道台灣家常菜 好媽媽台灣館
![](https://www.openrice.com/userphoto/Article/0/2J/000I43FE66D5113E59D9BCj.jpg)
圖:陸月妹
想轉個口味就可以嚟呢間小店,一嘗寶島風味。招牌菜之一滷肉飯嘅滷肉肥瘦有致又入味,加埋酸菜撈飯食,香濃而唔死鹹,加埋半隻溏心蛋夠滿足。菜甫蛋披薩睇落的確幾似厚批Pizza,厚厚一件食落有蛋汁唔乾身,香口得嚟同時食到菜甫嘅惹味同蛋香。其他招牌菜例如皮蛋凍豆腐、滷水拼盆同香酥大雞排都係港人熟悉嘅台灣味道。
識食梗係飲埋湯 美味餃子店
![](https://www.openrice.com/userphoto/Article/0/2J/000I44CC690C43E8E4E804j.jpg)
圖:A姐M佬,Don_L
店名夠簡單直接,就係一間食好味餃子嘅小店。有雲耳椰菜餃、韭菜肉餃同白菜肉餃三款餡料,然後再揀要湯餃同煎餃。唔好以為夏天天氣熱大家都揀煎餃,因為呢度最出名嘅唔係餃子,而係湯底!招牌野葛菜煲生魚豬骨湯無味精唔油膩,飲到鮮味但完全唔腥。餃子大大粒,皮滑多餡,加埋秘製辣菜脯一齊食十粒再飲埋碗湯,又係飽足嘅一餐。
足料潮州打冷 陵發潮州白粥
![](https://www.openrice.com/userphoto/Article/0/2J/000I452E4F27DB06DD479Aj.jpg)
圖:車媽媽
蠔仔肉碎粥童叟無欺,蠔仔肥美飽滿,加埋肉碎同粥底嘅大地魚,鮮甜無比。想食香口啲嘅可以嗌埋煎蠔餅。另一麻甩推介係韭菜豬紅,望落以為好簡單,但豬紅夾落唔散入口滑溜,吸收哂醬汁精華,再點少少潮式辣椒油簡直係絕配,韭菜一樣入味唔洗再點任何調味。最後一提餐牌無寫價錢,但唔少食客都覺得價錢公道,值得翻兜。
酸爽涼麵vs熱辣雲吞 津津 好金の味
![](https://www.openrice.com/userphoto/Article/0/2J/000I466441B0657EE3552Cj.jpg)
圖:mandymanlovefoodie
夏日炎炎,不如嚟碗涼麵?呢度嘅涼麵係重慶涼麵,醬汁酸酸辣辣咁,配滑溜涼麵同花生碎、蔥花、芫茜等配料,香濃開胃。不過招牌菜其實係重慶雲吞,亦即係紅油抄手,唔好畀面頭層紅油嚇到,一嚟一樣可以自己揀辣度,二嚟味道偏香辣,唔會太嗆喉亦唔會太麻。Bite Size雲吞皮薄餡咸鮮,就算配清湯都一樣有唔少捧場客。
隱世特色麵包店 上野酵素麵包生活館
![](https://www.openrice.com/userphoto/Article/0/2J/000I47F4B09BA9E65E18FBj.jpg)
圖:秋之回憶7778,Keilwk
呢間係唔少澱粉質控私藏嘅小店之一,招牌玫瑰洛神包嘅粉紅色嚟自玫瑰粉,裡面仲有蜜餞洛神花同Cream Cheese,質地比較實之餘又唔乾,細食嘅女士食半個就夠飽。另外有相當考功夫嘅紫玉酥,一層層酥脆外皮下面係帶自然香甜嘅芋泥。仲有香港平時好難搵到新鮮出爐嘅鳳梨酥。雖然麵包糕點單價唔低,但比連鎖店嘅空氣麵包,CP值立刻高一班。
隨時接收最新資訊
讚好OpenRice專頁!