如果冬天要食雪糕，夏天就更加搵唔到唔食嘅理由。不過喺超巿或者便利店推開雪糕櫃，閒閒地都有十零廿款，甚至幾十種選擇，邊有咁多quota試晒喎？開飯仔就為大家揀咗幾款最新嘅嚟介紹下。

Fruity & Creamy系列   MÖVENPICK

平時食開呢隻牌子嘅朋友，通常都最鍾意佢嘅咖啡味，或者青檸雪葩，今個夏天可以試下新口味喎。最近首次推出Fruity & Creamy系列，以雜果雪葩混入瑞士忌廉雪糕，係幾清新同香滑呀。兩隻新味分別係熱帶雜果雪葩忌廉雪糕，同雜莓雪葩忌廉雪糕。前者用咗香蕉、熱情果同印度紅皮芒果，味道清甜；而後者就包咗5款雜莓：黑加侖子、藍莓、紅桑子、接骨木莓、黑莓，食落酸酸咪咪咁幾fresh下。

麻糬系列   Häagen-Dazs

有冇大大可以話我知Häagen-Dazs究竟總共有幾多款味？喺日本推出咗一排嘅「華麻糬」系列，終於嚟到香港喇，有兩款味：黑糖大豆粉、芝麻核桃，前者打開就見到厚厚嘅大豆粉同麻糬混埋黑糖醬，黏黏地又甜甜地，後者就黑黑地，係黑芝麻醬呀，嗶起可以拉到幾高下。再嗶落去，就會發現香脆嘅核桃碎，麻糬連雪糕一齊食，口感又軟又有嚼勁。

另外仲有Decorations系列，一開蓋就見到一粒粒曲奇碎，一款係酸酸甜甜嘅芝士莓果曲奇雪糕，一款係甘甘甜甜嘅香蕉焦糖曲奇雪糕，建議可以等啲雪糕溶咗少少，就攪勻佢一齊食。

韓國生朱古力雪糕

嚟自韓國嘅生朱古力雪糕，有Lavelee雪糕杯同Labeaute脆皮雪糕。雪糕杯嗰隻面頭都幾多朱古力粉，唔小心大力一吸氣或者呼氣就GG了。內有乾坤呀不過，一層朱古力流漿同一層雲呢嗱雪糕，混埋一齊又唔會話太甜，啱啱好。

至於脆皮雪糕就甜啲喇，朱古力味勁濃郁，外層嘅脆皮亦相當之脆，所以好好口感之餘，亦都好易碎，食嗰陣都有啲論盡……

啖啖果肉雪條  SlicePop

呢兩條果味雪條，可以話係抹茶、朱古力等味以外嘅清新選擇。藍莓味都幾香幾多汁嘅感覺，而奇異果嗰款，就更加聞到好香嘅奇異果味，同埋可以食到一粒粒嘅果肉同果核，就算甜，都係果甜。

而除咗喺便利店食雪糕，雪糕迷點會放過雪糕店嘅雪糕吖，由日本最新引入嘅cremia軟雪糕就當然係大家都想去試啦，另外呢兩間都諗得過喎。

唧唧抹茶軟雪糕   Sweet House ChaCha

抹茶控實有食開呢間嘅抹茶雪糕，佢哋最近又有新搞作，推出咗特濃抹茶軟雪糕，係用抹茶啫喱做底，on top就有宇治抹茶雪糕，然後灑啲抹茶粉喺面，再插多支唧唧抹茶醬，鍾意唧幾多就唧幾多，茶味夠晒香濃，一定滿足到抹茶控。但期間限定去到7月16號咋留意返。

抹茶忌廉芝士刨冰  SHARI SHARI Kakigori House 氷屋

粉絲可能會有留意，呢間日式冰屋耐唔耐就會出下啲季節限定嘅刨冰，之前春天係櫻花味，而家嚟到夏天，就變咗做抹茶忌廉芝士味喇。個樣幾靚，係用法國忌廉芝士搭埋京都宇治抹茶粉整出嚟嘅，係幾吸引。

文、相：Kar