以前去北海道，個個都係買白之戀人返嚟，近幾年就多咗好多花款，而白色波波——汽球布甸就係其中一款新寵兒喇，你哋有冇friend子送過畀你食？冇都唔緊要，香港而家都有得食喇！有舖頭喺日本直接引入咗佢嚟香港呀，仲有兩款蛋糕都係第一次喺香港有得食㗎！
汽球布甸嘅造型真係成個波波咁，彈彈der好得意。日本嗰邊有多幾種味嘅，香港就暫時有3種：原味、朱古力味同埋期間限定嘅芝士蛋糕味。食嘅方法都好過癮，用支牙籤拮個窿，啲布甸就會自己滑出嚟喇，再淋埋焦糖醬或者布甸醬就食得！布甸口感好滑，牛奶味超級重呀。
另一款嘅北海道牛奶產品就係呢款牛乳千層蛋糕喇，牛奶味比起平時食到嘅3.6牛乳更加香濃，原來係因為用當地自家牧場養嘅牛所生產嘅牛奶製嘅，全天然。負責人話每個蛋糕用嘅牛奶仲有晒登記制度，可以搵返係邊隻牛牛生產㗎。所有蛋糕都係以冷凍形式，北海道直接空運到港。食嗰陣睇下你想要咩口感啦，實少少似雪糕嘅就冰箱拎出嚟攤一陣好食，想要軟身啲似返蛋糕嘅就攤耐啲啦。
【飲食潮流】： |
仲有呢款芝士蛋糕都係第一次登陸香港，佢同其他cheesecake最唔同嘅地方就係，喺芝士蛋糕嘅面層，有多層法式焦糖燉蛋呀！令到成個cake嘅口感再豐富咗，帶有芝士香味之餘亦有絲絲焦糖嘅甘甜，食落仲食到一粒粒脆焦！
負責人話每個月都會限量入貨喎，今個月食唔到就等下個月啦~~
如水亭
地址：尖沙咀河內道18號K11購物藝術館B1樓 Market Place內
文、相：Kar
開飯編輯推介：
2. 2月份好評餐廳十強
熱門文章推介：
隨時接收最新資訊
讚好OpenRice專頁！