深井裕記大飯店，開飯仔細細個就聽過佢個名㗎啦，招牌燒鵝馳名中外，不過唔係個個都方便入深井㗎嘛。如果而家同你講去尖沙咀就食到又點睇？而且仲要係裝修走悠閒清新風格，Menu又多咗更多特色小菜，無理由唔叫埋親朋戚友去試喎！
裕。鵝莊由家族第三代James主理，選擇喺尖沙咀開店最主要係想方便一眾饕客嚟食燒鵝。而且大家亦可以放心，新店唔單止繼續沿用過半世紀嘅家傳秘方，亦特別由總店請到經驗豐富嘅老師傅到尖沙咀，由醃製、上皮到燒嘅過程都喺新店進行，保證大家食到同深井裕記一樣水準嘅出品。
教你食招牌燒鵝
深井燒鵝（例牌）（$150）
講多無謂，嗌碟例牌燒鵝試下最實際。餐廳選用養咗90日嘅清遠黑鬃鵝，每隻重9-10斤。用祖傳秘方加上明火燒烤，就成就出皮脆、甘香、肉嫩，而多汁嘅燒鵝啦。油潤而且脆卜卜嘅鵝皮下面有一層皮下脂肪，食落脂香十足又唔太膩。鵝肉雖然又未到見得到肉汁流出嚟，但食落的確相當Juicy又夠厚。
深井燒鵝（下庄）（$180）
不過講到燒鵝，又點會夠James熟呢？佢同開飯仔解釋，其實原隻（$580）鵝足8-10人食，而例牌就係四分一隻鵝，啱2-3人分享。而例牌會俾上庄定下庄，就真係單純睇運氣喇。如果真係好想食燒鵝髀嘅話，建議畀多啲錢嗌碟下庄。燒鵝髀的確係油脂香更濃郁更邪惡，而上庄嘅鵝胸就肉味濃啲，而鵝背會偏重香料味，各有特色啦。
豉油皇灼鵝腸（$128）
既然賣得燒鵝，自然亦有唔少以鵝嘅其他部位整嘅小菜同小食。例如滷水鵝肝（$68）同鵝油炒時蔬（$80）等，不過最受歡迎嘅，就要數到呢碟豉油皇灼鵝腸。鵝腸食落真係好有腸味，嗱唔係無野搵嘢嚟寫，因為餐廳嘅鵝都係師傅自己劏，自然鵝腸都係新鮮而唔係冰鮮貨，保存到腸裡面嘅肥膏，恰到好處嘅騷香加埋爽滑而完全唔硬唔韌嘅腸皮，會令人忍唔住不斷食。
特色小菜+小食有驚喜
甜薯黑椒安格斯牛粒（$138）
除咗燒味之外，James同經驗豐富嘅中菜師傅新店亦特別設計咗一系列嘅特色小菜。好似呢碟甜薯黑椒安格斯牛粒咁，有少少大牌檔蜜糖薯仔牛柳粒嘅感覺。不過薯仔就「升呢」做夠哂Sweet嘅日本甜薯，牛柳粒亦變做牛味濃郁嘅安格斯牛粒。加埋惹味黑椒，送飯一流。
黃金蝦多士（$68）
小食方便亦有驚喜，懷舊蝦多士加埋鹹蛋黃，完全就係「邪惡力量」聯乘！鹹蛋黃碎夠鹹香，蝦肉亦相當彈牙，最難得嘅係擺咗一陣之後依然唔會覺得油膩，食得出師傅功架唔錯。
懷舊炸鮮奶（$78）
懷舊炸物仲有呢碟炸鮮奶，係其中一位師傅特別用20年前喺中菜廳學到嘅食譜，不過將主角改為北海道3.6牛奶，軟心牛奶餡食落奶香同甜香非常討喜。
更多【新店直擊】： |
配返支手工啤酒！
（左起）淡愛爾、XH、拉格清啤（$58）
餐廳唔單止裝修走Casual Dinner路線，從Drink List亦見到創新嘅巧思：有手工啤酒揀！James話試過唔同牌子，最後先揀咗喺火炭有釀酒廠嘅常陸野貓頭鷹牌。而當中最啱配燒鵝嘅就係拉格清啤，貪佢有啤酒花香，又唔會話麥味太重蓋過肉嘅甘香。
武夷大紅袍（$48）
想傳統返少少嘅話，亦可以配返杯茶。餐廳提供畀每位客人嘅係蕎麥茶，特別得嚟仲有解膩作用。而武夷大紅袍亦係推介，以茶壺上枱，勝在茶葉浸得耐少少都唔會出現澀味，茶湯清澈口感温厚，而且可以回沖2-3次。
食到飽，走之前不妨去呢個「鵝」字前面打個卡，皆因其實佢係以前老店嘅招牌之一，特別翻新過後搬到新舖。呢份傳承嘅心思，加上老師傅們嘅功架，同James三代人對每道菜式嘅用心，係值得大家支持下嘅。
新張優惠！
見大家睇到最后一段咁畀面，開飯仔特別提提大家，新張期間消費會送一隻鵝造型嘅筷子座（數量有限送完即止），而成個12月晚市再追加每人免費一碗桑寄生蓮子蛋茶！想方便又舒服地嘆到炭燒燒鵝，不妨早啲約齊飯腳。
裕。鵝莊
尖沙咀亞士厘道37號九龍中心地下C號舖
*部分菜式為限量發售，菜式價錢最後以餐廳出示為準，另加一服務費
文、相、片：Cathy