講到跑馬地，可能大部分人會諗起馬場或者豪宅，但唔好以為呢度得富豪飯堂，行過嚟黃泥涌熟食中心就有幾間用心嘅餐廳。由自家製點心，到特色油砂多；由抵食三餸飯，到鑊氣小炒王都應有盡有。雖然定價嚟講平均比其他區都高，但能夠將其他熟食中心都有嘅選擇做得特別出色，就係平凡中嘅不平凡。
油砂厚多士+魚片蛋治 昌記
嚟到呢間開業接近半世紀嘅小店，唔少人都會嗌返份油砂多，油砂即係牛油加砂糖，牛油香加脆多士本身已經夠邪惡，加埋砂糖喺面更有外脆內軟口感之外，食落甜甜地唔太膩。另一招牌係魚片蛋治，手打魚片嘅彈牙同煎得啱啱熟嘅蛋意想唔到咁夾。意猶未盡嘅話仲可以試埋雪菜肉絲米同熱奶茶，都係經典港式茶記滋味。
街坊價自家製點心 祥發點心
的確唔少熟食中心都會有呢種街坊價點心店，但其實大部分都係嗌來貨。而呢間開咗唔夠兩年嘅小店就堅持自己整點心，例如鮮蝦水晶餃就係用鮮蝦自己剝殼嚟做餡，食落自然特別爽口彈牙。腸粉夠薄身，半透明見得到裡面嘅配料。另外仲有大路嘅杞子燒賣王、羅漢炸春卷、傳統蓮蓉包、懷舊糯米雞等差唔多30款畀大家慢慢揀。
更多【熟食中心尋寶】： |
抵食三餸飯+出色細蓉 清香園
呢度嘅三餸飯盒以同區嚟計完全就係大件夾抵食。檔口細細但每日都會有十幾款餸菜任君選擇，例如蒸肉餅、炒豆角、魚香茄子等，都係家常小菜，加上白飯任裝仲送埋真材實料嘅例湯，成個Package無得輸。但其實佢地嘅招牌係雲吞麵，雲吞正宗皮薄餡靚，無論蝦肉同豬肉，甚至係瘦肉同肥豬肉嘅比例都啱啱好，加埋少少大地魚，食落鮮香多汁。
鮑魚王子主理鑊氣小炒 銖記海鮮飯店
一到晚市呢個檔口就相當旺場，認住呢位有鮑魚王子之稱嘅總廚陳松輝，佢喺唔少大酒樓做過，拿手菜之一係溏心鮑魚！但自問想食平啲啲嘅話，可以嗌佢地另一招牌風沙雞，雞肉醃過後吊起風乾一晚，第二日炸熟後加上炸蒜蓉，令人一邊嗌熱氣一邊忍唔住一啖接一啖咁食。黃金蝦、蒜蓉粉絲蒸蟶子、原盅雞燉翅等都係拿手菜式。
文：Cathy