想一秒掃走負能量？！不如試下食甜品啦！一食落去就馬上甜入心。唔怪得女仔成日話「食甜品係第二個胃」啦！
就算已經過咗中秋，但一出街都係好易熱到成身汗，要食返啲凍冰冰嘅甜品降降溫！今次開飯仔就帶大家食盡香港嘅刨冰！一齊過一個冰涼嘅九月啦！
隱世台式剉冰 一糖
呢間「隱世」甜品店一向都有啲名氣，深受附近街坊歡迎！甜品選擇非常多，有港式，又有台式，三心兩意嘅你一定有排諗啦！刨冰方面佢哋提供四種口味﹕芒果乳酸冰、綠茶牛奶冰等等，但最受歡迎嘅莫過於佢哋嘅黑糖芋圓紅豆仙草剉冰！可以按個人喜好落幾多黑糖汁都得。
又平又大碗冰 甜圓坊
深水埗嘢食出晒名「大件夾抵食」，而呢間台式甜品店嘅甜品全部都係40蚊之內就可以食到啦~佢哋主打各種地道嘅台式糖水，例如有仙草奶凍、三色冰等。特別推介佢哋嘅招牌綜合挫冰，有芋圓、地瓜丸、湯丸、紅豆等，非常足料。怕食唔晒仲可以揀招牌迷你挫冰，啱晒小鳥胃嘅女生們啦！
搞怪水果配搭 馬哥奇冰
聽個舖名都知道呢間糖水舖係專食「冰」啦！佢哋主打各種水果口味嘅綿綿冰，有西瓜搭荔枝嘅口味，又有士多啤梨搭水蜜桃嘅，夠晒特別！綿綿冰食落好滑，入口即溶，唔知以為自己食緊雪糕添呀~
超大碗綿綿冰 大飯糖甜品小食屋
呢間餐廳名副其實係一間「大飯堂」，裝修都成間飯堂咁~但除咗提供台式主食之外，仲有大大碗嘅綿綿冰可以食呀！當中較為少見嘅Baileys甜酒口味就最受歡迎啦！酒味突出之餘，再加埋啲穀物脆片同涼粉，口感夠晒有層次呀~
泰式荼葉刨冰 ChaTraMue
圖﹕cowwoc
日式、台式刨冰就食得多，咁泰式刨冰呢？呢間泰國過江龍主打泰國荼葉，新推出泰國奶茶及泰國玫瑰花茶口味嘅刨冰，冰刨得非常鬆軟綿密。最推介佢哋嘅泰國奶茶味，超有奶茶香，附送奶茶醬、小饅頭同涼粉，一啖冰一啖小饅頭，口感一流~
文﹕Kiko