「真正重要的東西，用眼睛是看不見的。」小王子迷一定記得呢句話吧？好多事都要用心先至可以睇得見。有兩位小王子粉絲，各自運用自己嘅專長，將小王子化身成為幾款甜品同埋酒，仲嚟個crossover，實行畀大家嚟一趟味覺之旅。

第一站：青蘋果慕絲 x 花味手工啤

起點當然係B612星球啦，銀色凹凸表層入面，埋藏住嘅係粒粒青蘋果肉，配搭埋花味嘅手工啤，成件事夾埋一齊，就有一種好清新好fresh嘅感覺。Chroma甜品師Jody表示，其實就好似小王子一開始出發嗰陣，仲係好天真、好青澀，好似一個小朋友咁。

第二站：星球馬卡龍 x 蜂蜜酒

開始出發去星球探索喇！三款星球造型嘅馬卡龍，配埋軌跡嘅畫碟，夠晒視覺效果。而呢款甜品亦係幾年前，Jody闖出名堂之作嚟。每粒馬卡龍嘅外層同夾餡都係唔同味㗎，例如好似有酸酸地嘅紫羅蘭雜莓，同甜甜地嘅百花蜜雲呢嗱咁。而呢站配嘅酒係用本地蜂蜜發酵釀造嘅蜂蜜酒，城釀首席釀酒師Eric希望大家都可以喺成長中記返起童年嘅初心，同埋回憶中嘅甜。

第三站：朱古力慕絲配玫瑰荔枝雜莓朱古力蛋糕 x 威士忌

最後呢站就係講小王子嚟到地球，呢個地球仲內有乾坤添㗎，打開朱古力外殼，就會見到喺74%朱古力慕絲上插住朵食用玫瑰花！好靚好浪漫！「最重要，最靚嘅玫瑰一直都喺度，留待大家去發現。」而威士忌亦同樣係一種好浪漫嘅酒，係前人將N年前嘅味道留住，留畀N年後嘅人去感受。略辛嘅Whiskey搭苦中帶甜，又有啲果酸味嘅甜品，味蕾嘅感覺最為豐富，就好似品嚐緊人生一樣。

見到年紀輕輕嘅Jody，設計出3款咁靚嘅甜品，唔講唔知仲以為佢好有天分，點知傾落先發覺，原來佢當年嘅家政同視藝科，都係肥佬㗎！「因為唔忿氣囉，覺得自己冇理由整唔掂，冇理由會肥佬。」於是就靠自己睇youtube、google大師去學整甜品，一步一步慢慢研究，終於憑住努力同創意，畢業後就開設咗自己嘅一個烘焙基地，全身投入去做甜品師啦~ 今次呢3款甜品嘅外貌，全部都係Jody自己一下一下咁樣畫/噴出嚟，所以每個細睇都有啲唔同呀。

詳情
小王子甜品之旅
地點：太子通菜街223麗明大廈地下F號舖（The Oak Crafted）
日期：5月27日
時間：17:30 - 19:00
報名：https://bit.ly/2IAKgTm

文、相：Kar