2024年獲得米芝蓮必比登推介，以及50 Top Pizza Asia-Pacific（第24名）嘅拿坡里手工薄餅專門店，近日由跑馬地搬至灣仔重開喇！新店座位多咗，菜式亦有所增加，如炸餡薄餅、錢包薄餅等，連烤爐都重新砌大個啲！咁應該試啲咩？睇落去就知喇～

總廚Gavino Pilo表示新烤爐重達4噸，連內裡用嘅磚塊都係手工出品

傳統薄餅新口味

麵糰按傳統技術每日新鮮製作

總廚對拿坡里手工薄餅有幾重視？佢再三強調：「我哋係拿坡里薄餅專門店，唔係意大利餐廳。」，相信大家明白吧～新店餐牌加入新口味薄餅同海鮮元素，嚟到梗係試原個薄餅先啦。

Luciana（$228）

原個薄餅只需烤90秒就出爐，所以同一時間只可以烤5個左右。新口味Luciana展現地中海風味，皆因加入鮮嫩嘅地中海八爪魚，而聖馬札諾番茄醬同車厘茄則帶嚟清新酸爽嘅滋味，加埋鹹香嘅埃塔橄欖、蒜蓉、辣椒碎新鮮羅勒同橄欖油，成個組合好開胃。

Donnarita（$218）、Montana（$228）

如果你係芝士控，red pizza之一嘅Donnarita就啱你喇！呢款餅底同樣掃上聖馬札諾番茄醬，然後鋪滿豬肉腸、雜菇、煙燻水牛芝士同羅馬羊奶芝士，再以辣椒碎同新鮮羅勒、橄欖油作點綴，口感豐富，食落帶微微辣味又唔會過鹹。

想特別啲可以試「yellow pizza」Montana，其實係餅底掃上坊間少見嘅聖馬札諾黃番茄醬，味道幾清甜。不過有惹味嘅拿坡里莎樂美腸、新鮮雜菇、煙燻水牛芝士同羅馬羊奶芝士互相平衡味道，即使係以上3款之中最「清」嘅口味都依然好食。

總廚示範正宗摺拿坡里薄餅手勢

原個薄餅直徑約13”，皮邊炸至脹卜卜但好鬆軟，而餅皮芯拉至3mm咁薄，所以總廚話要摺好先可以「托」起配料大啖食！

外賣盒新增「網底」

汲收之前嘅經驗，為咗令大家返屋企都可以還原拿坡里風味，外賣盒都新增「網底」，咁樣連盒入焗爐翻熱，餅皮都唔會黐底。

特色薄餅新口味+系列

「炸餃子」都係薄餅？！

Completa（$188）

喺意大利有款「行走嘅Pizza」 Pizza Fritta（炸餡薄餅），外型好似特大炸餃子，當地人唔會切開，就咁拎住一邊行街一邊食，不過總廚同團隊商議後，配合香港文化切開先上菜。Completa係新口味，清甜嘅聖馬札諾香濃黃番茄醬配上Cicoli火腿、Fuscella乳清芝士、煙燻水牛芝士同羅馬羊奶芝士，炸起後一定要趁熱食，芝士融為一體好creamy，外脆內軟，而且有新鮮羅勒同黑椒提香，中和一下芝士嘅飽滯感。

Contadina（$208）

新增嘅錢包薄餅系列現時有2款口味，外形有啲似pizza版taco，仲係巨型嗰種。師傅將薄餅餅底烤好後，立即舖上食材然後對摺，其中Contadina口味餡料包括傳統意式火腿、阿傑羅拉水牛芝士、火箭菜同黑松露碎；餅底嘅餘溫可以令芝士融化，可見夠新鮮呀！呢款薄餅所用嘅麵糰同傳統原個薄餅一樣，但冇拉咁薄，口感飽滿啲。

新增開胃Bowl Platter

Bowl Platter設有4款口味

Polpo alla Luciana（$128）、Melanzane in Carrozza（$108）

提供薄餅之外，仲有開胃菜Bowl Platter啊，而且冷熱款式都有。傳統拿坡里菜Polpo alla Luciana選用鮮嫩彈牙嘅八爪魚，加入聖馬爾扎諾番茄醬、埃塔累橄欖同脆麵包，集甜、酸、鹹、脆、juicy於一身，非常開胃。Melanzane in Carrozza則更展現拿坡里傳統菜嘅精髓，裹上麵包碎嘅茄子同煙燻阿傑羅拉水牛芝士、西西里乳清芝士層層疊，炸成「迷你三明治」外型，蘸上酸度較高嘅櫻桃番茄醬，一啲都唔油膩。

COSTA（$138）、Tartar di Tonno Bufala e Limone（$108）

如果想清新啲，COSTA同Tartar di Tonno Bufala e Limone係唔錯嘅選擇，前者用上淡香嘅Andria burrata IGP芝士，而阿馬菲檸檬皮嘅香氣有畫龍點睛效果；後者以新鮮金槍魚他他同水牛芝士為主角，加入索倫托檸檬帶嚟清新柑橘風味。

Little Napoli
地址: 灣仔大王東街6-16號地舖

文：Cathy

相、片：Yan Yan