講開台灣野通常都會唸起鹽酥雞、臭豆腐同滷肉飯等台式小食，但台式小菜就唔係度度都食到啦。旺角呢間新開嘅台灣麵食品牌，喺香港已經有幾間分店，但旺角新店喺野食同裝潢方面都有別於其他，除咗傳統台式小食，仲有台式小炒同一啲創意小食添！

台式三寶麵($68)

三寶麵其實就係牛肉湯麵，不過配料就有牛展肉、牛筋同牛肚。湯底用咗大量牛骨、蒜頭同洋蔥等熬製超過十小時以上，所以湯頭濃郁鮮甜。牛展肉每一舊都晶瑩剔透，口感軟腍。

炸霸王雞腿飯($55)

食台灣野又點少得炸雞扒，呢隻係美國大雞腿，真係大過哂成塊臉，加埋肉燥同酸菜一齊食，味道就豐富啲同埋食落就唔會咁乾啦！

蒜仔肉($68)、塔香三杯中卷($88)

兩款都係傳統台式小菜，台式蒜仔肉味道鹹鹹香香，夠鑊氣，用嚟送飯就最啱。三杯中卷有淡淡九層塔香氣，中卷都新鮮彈牙。

藍蝦餅($78)、酥炸腐皮蝦卷($48)

特色小食藍蟹餅，呢個就有少少Fusion菜嘅感覺，蟹餅用咗大量蟹身肉，肉質會較雪白同結實，而且本身就已經加咗洋蔥同蛋黃醬等調味。腐皮蝦卷嘅手打蝦膠內加入咗一粒粒嘅墨魚，口感就豐富啲，包埋腐皮拎去炸，食落好香脆！

招牌生果茶($38)、香芋奶茶($24)

食台灣野又點可以唔飲台式茶飲，招牌生果茶果味都尚算香濃。而香芋奶茶香芋味都幾出，而且唔會過甜。

台灣麵

地址: 太子彌敦道750號始創中心B1樓B02-B06號舖

文、相、片: Yanica