去戲曲中心一定係睇粵劇？咁又未必！西九龍文化區戲曲中心最近有間新中菜廳進駐，由有三十年經驗嘅中菜大師許美德先生及其團隊主理。中菜廳主打大人細路都鍾意食嘅片皮鴨，仲有唔少招牌菜式同點心，約埋家人同朋友食就最啱啦！

招牌片皮鴨($380/半隻、$680/一隻)

呢度嘅北京填鴨用咗從德國購入嘅烤爐，令鴨喺低溫下變熟，再加上長達36小時嘅工序，確保每隻鴨上枱果陣都熱辣辣，外皮仲脆卜卜添。當然！師傅都會係食客面前即場切鴨啦！而且餅皮仲會放喺一個有發熱包嘅籠內，可以保溫45分鐘，咁就唔怕啲餅皮變凍哂。另外配埋自家調製甜麵醬、蘿蔔絲、酸甜嘅子薑(如果子薑不在時令，會以哈蜜瓜代替)、青瓜絲同京蔥絲一齊食，真係食多幾件都無問題！

肉餅蒸蟹圈($498)

肉餅蒸蟹圈係蜑家菜式，視覺上好震撼，係成隻全蟹鋪喺肉餅上啊！喺蒸嘅過程中，肉蟹會慢慢滲出蟹汁，所以肉餅食落會有蟹嘅鮮味。客人仲可以自己要求用咩蟹嚟蒸，真係好貼心啊～

黃金釀蟹蓋($98/件，2件起)

選用加拿大蟹，每隻都係人手親自拆肉，再加上磨菇同洋蔥等配料釀入蟹蓋內，配料味道較重。

鴛鴦胡椒焗蝦($168)、杏汁燉白肺湯($88/位，$268/4人份)

大廚話皆因每種胡椒都有獨特嘅味道，所以呢味鴛鴦胡椒焗蝦就用上兩種胡椒去焗，味道先夠香，而且香辣惹味。杏汁燉白肺湯燉咗四小時，杏汁味就濃啲，飲得出好足料，而且有潤肺功效！

滿樂蔥蒜牛肉崧煨飯($148)

呢味煨飯其實靈感就係嚟自意大利燉飯，大廚用咗炒飯底，加再上軟腍嘅牛柳粒去煨，估唔到又幾出色。

遠年陳皮叉燒酥($48)

食中菜又點少得點心呢，除咗供應經典點心，亦都有唔少創意點心揀。呢度嘅遠年陳皮叉燒酥喺水準之上，食落口外皮酥脆鬆化，師傅話因為呢味點心工序特別麻煩，所以而家無咩人肯做架喇。

焦糖原籠馬拉糕($48)、水牛芝士奶黃包($48)

焦糖原籠馬拉糕好鬆軟下，焦糖味又幾突出。另外水牛芝士奶皇包係一個全新配搭，估唔到水牛芝士同奶皇味道咁夾喎。

滿樂中菜

地址: 尖沙咀柯士甸道88號戲曲中心1樓2-4號舖

文: Yanica

相、片: Tom Li