香港地打邊爐就話多，但主打東南亞式嘅火鍋店就少見啲啦～跑馬地最近新開一間東南亞風味火鍋店，由馬來西亞華橋Kevin Lim及建築師Jeffrey開設，佢地將火鍋及東南亞美食結合，創出唔少具有東南亞風味嘅湯底及配料。
講到點解會合作開設餐廳其實都有段故，Kevin本身於上環已經開設一間東南亞麵吧麵佬到，而Jeffrey就係從英國回流嘅建築師，佢一直都希望喺跑馬地呢個小社區開一間寧靜舒適嘅餐廳。有一日佢去麵佬到用餐嗰陣就無意中聽到旁邊嘅客人讚道：「這就是跟我家裡一模一樣的味道！」之後發現Kevin 同自己的想法差唔多，就誠意邀請佢為自己嘅火鍋店設計東南亞風湯底。
招牌娘惹喇沙湯加入約二十種香料，如南薑、香茅及班蘭葉等，未食已經聞到陣陣香氣，因為係正宗嘅娘惹喇沙，味道都辣，又幾惹味。
如果唔食得辣，可以試吓泰式椰子雞湯，同我地平時食開嘅椰子清雞湯唔同，呢個湯底加入咗椰奶，杰身呈奶白色，有少少平時食咖喱雞嘅感覺，真係好有東南亞風味～而且雞肉都好嫩滑。想多個選擇可以試埋蕃茄牛尾湯，呢個湯底加咗越南船河嘅香料，味道更加豐富～而且連埋牛尾一齊煲煮，骨膠原爆發～
更多【新店直擊】： |
配料方面都有唔少東南亞特色配料，如紅咖喱鯪魚丸及馬拉盞蝦丸，兩款都係自家手打，口感扎實，香料味較重。
而泰式肉碎餃靈感來自於泰式生菜包，味道帶少少酸，用嚟打邊爐又唔錯～
餐廳仲有供應唔少小食，如青木瓜沙律、炸冬蔭軟殼蟹及香辣椰子炒蜆，炸冬蔭軟殼蟹炸得香脆，加入冬蔭公味道微酸，變相無咁膩。而香辣椰子炒蜆特別一提入面嘅椰子肉，吸收晒醬汁好惹味啊！
地址: 跑馬地奕蔭街13-15號景怡大廈地舖
文、相、片: Yanica
