返嚟喇～呢間意大利百年甜品品牌無懼疫情，擴充中環旗艦店店面，完成裝修。作為旗艦店，供應嘅食物自然同其他分店有所唔同，呢度主打海鮮料理、手工意粉同手工薄餅外，更設有酒吧區同供應多款雪菲蛋糕，加上古堡風格嘅裝潢，喺度用餐別有一番風味。

海鮮料理

馬納羅拉烤焗極級鮮蠔（$238/4隻）

蠔係唔少海鮮控鍾意嘅食物，而呢道馬納羅拉烤焗極級鮮蠔選用有法國蠔王之稱嘅吉拉多蠔（Gillardeau oysters），肉質肥美大隻。蠔面放上蒜瓣、巴馬臣芝士等材料焗製，味道鹹香，但鍾意食生蠔嘅朋友可能會覺得蓋過少少鮮味。

意式烤八爪魚配輕辣煙燻甜椒醬（$308）

意式烤八爪魚選用由西班牙直送到港嘅八爪魚，用醃汁浸泡一晚，再炭火慢烤。咬落彈牙又有少少炭香，同微辣開胃嘅輕辣煙燻甜椒醬幾夾。

手工意粉

紅蝦燴手工意大利寬條麵（$308）

頂級珍寶紅蝦比一般紅蝦大隻好多

餐廳有唔同款式嘅手工意粉，例如以紅蝦配手工寬條麵。西班牙頂級珍寶紅蝦，味道比一般海蝦濃郁；寬條麵用紅蝦同多款海蝦熬成嘅湯汁燴煮，再淋上紅蝦經炭火慢烤後逼出嚟嘅蝦汁，令鮮味更加濃厚。

煙烤海鰻魚配手工意大利麵（$298）

另外煙烤海鰻魚則配一般粗度嘅手工意大利麵。喺意大利好多時都食到smoked ham，但其實煙烤海鰻都係當地傳統食品。煙烤海鰻同蔥蒜用酒煮一煮，使魚肉更加香，配埋魚子醬令意大利麵更鮮甜。但呢兩道意大利麵較輕盈，男士未必夠飽肚。

手工薄餅+雞尾酒

黑松露豬肉腸手工薄餅（$288）

餐廳另一款手工菜就係薄餅喇！每份麵糰先喺雪櫃經過24小時發酵，再加室溫2小時發酵，用315度明火烤製，令餅底香脆鬆軟。其中黑松露豬肉腸手工薄餅選用意大利豬肉腸，彈牙有油香，而蘑菇片則可以減輕油膩感。

左：Blossom Fizz｜右：Negroni（同價$88/杯）

旗艦店另一特色係設有復古酒吧區，並供應意大利經典雞尾酒。其中Negroni用上氈酒、苦艾酒同金巴利，再加塊橙皮點綴，酒精濃度高但帶點果香。想感覺淑女啲嘅話，Blossom Fizz係唔錯嘅選擇；用薰衣草玫瑰糖漿做成粉紅色基調，再加入氈酒，酒味都算明顯。

雪菲蛋糕

左：脆蛋白雪菲蛋糕｜右：蜜糖果仁雪菲蛋糕（同價$58/件）

朱古力雪菲蛋糕（$58）

雪菲蛋糕係意大利嘅國民級甜品，而且非常普及，而呢度就有6款口味畀大家揀。雪菲蛋糕嘅最佳口感喺-4°C到-8°C之間，所以一離開甜品櫃要盡快食用，先可以品嚐入口即融嘅質感。而以下3款係比較受歡迎嘅款式：
- 脆蛋白雪菲蛋糕外層嘅蛋白酥餅碎口感微脆，入面則係幼滑嘅忌廉同白朱古力。
- 蜜糖果仁雪菲蛋糕加入鳥結糖配料，如蜂蜜、果仁、蛋白等，食落香甜帶點果仁香。
- 朱古力雪菲蛋糕用上特濃黑朱古力、意式蛋白酥、忌廉等材料，以無麩質可可海綿蛋糕做底，味道濃郁，口感creamy。

Giovanni Pina Ristorante, Bar & Pasticceria
地址: 中環德輔道中135號華懋廣場二期地舖

文、相：Cathy.C