荃灣呢間新開嘅餐廳居然以「Girl Boss」做主題，咁大男人們咪嬲嬲豬？其實餐廳概念係想營造出女生一向追求嘅優雅、舒適嘅用餐空間，可以成為餐枱上嘅話事人！

整間餐廳以粉紅色為主打，再加上雲石餐枱、玫瑰粉紅+玫瑰金色嘅餐具，營造出好elegant嘅感覺。但餐廳用料亦配合番各位怕肥女生，以健康superfood入饌，而且低鹽低脂，炮製出西日fusion菜式！

舖頭最有賣點嘅，就係呢個名為Bossy Royal Set嘅三層架！邊個話三層架就一定食tea？即使晚餐都一樣可以放入英式三層架！一個價錢搞掂晒，只要$358，餐廳畀客人自己決定架上食物，包括：2款沙律/餐湯、2款前菜、1款主菜、2款漢堡/薄餅/意粉/意大利飯，份量十足。

先介紹主菜──海鮮拼盤($128)，每份有4款當季時令海鮮，採訪當日有珍珠貝、蜆、蝦及魷魚，調味係充滿蒜味嘅西西里汁。鍾意味道fresh啲嘅話，可以沾中間嘅法式白葡萄醋。旁邊仲跟1杯以雞尾酒醬調味嘅章魚架！

Lady煙肉蘑菇忌廉意大利粉配62度溫泉蛋($98)，粉紅意粉係由廚房們手工製作，再以紅菜頭汁調色，加埋芝士、煙肉、蘑菇等配料而成，口感有嚼頭，好掛汁！最吸引嘅係，流心嘅溫泉蛋汁令意粉更滑溜。

（左）三文魚柚子檸檬玻璃杯沙律($43)，首先將柚子檸檬醬倒入玻璃杯中，將蔬菜輕輕壓入杯中然後扭實杯蓋，就可以shake勻沙律。（右）凱撒沙律配漬溏心蛋玻璃杯沙律。

迷你芝士和牛漢堡($98/2件)，淡粉紅色嘅漢堡皮，加埋日本和牛、番茄、生菜等配料，簡單又好味，而且burger分量細細件，女生拎起嚟都可以keep住斯文look！

Bossy Royal Set以外，仲有一個為女生們打氣嘅Girl Power Set，客人可選1款漢堡/包，再配番shake shake薯條以及無酒精嘅Lady's Beer。

慢煮豬腩肉包，以豬腩肉做餡，再用包夾住一齊食，豬腩肉好香口，雖然有啲油膩，不過充滿油脂感，好味。

有別於麥記，薯條有齊普通薯仔及番薯條兩種，而且餐廳仲提供10款不同口味嘅shake shake粉，分別係：章魚燒、BBQ、咖喱杯麵、香蒜、芝士波、烤雞、海苔、黑胡椒、玉米湯及梅子。開飯仔就揀咗章魚燒味，雖然不太食到章魚燒味道，不過薯條依然香脆可口。

至於呢杯無酒精嘅Lady's Beer，蘋果忌廉梳打上面有厚厚嘅忌廉泡，味道好似哈利特波嘅奶油啤酒，好飲！而且入面仲有乾冰，一邊飲一邊會有bubble走出嚟添！

甜品方面有Cool! Coco!($58)，以芒果糯米飯做靈感，有芒果熱情果雪糕、脆米、芒果等配料，最特別嘅係底層真係有糯米飯架！

有脆米又有糯米，既香脆又軟糯，口感好豐富。

飲品繼續走搶眼路線，有（左）Girlboss Soda($48/杯、$98/樽)，喺櫻桃、雜莓味梳打擺咗一大片棉花糖；（中）以威士忌、baileys、蛋白及棉花糖調成嘅Healing Time($58/杯)；（右）Teddy Bear($58/杯)，除咗有朱古力沙冰、咖啡凍及朱古力碎之外，仲有好可愛嘅小熊及碎朱古力曲奇。

開飯仔推介Boost Monster Smoothie($58/杯)，大眼嘅藍色怪獸好趣緻，連埋檸檬味冰沙、提子吹波糖味冰沙，酸酸甜甜好解渴。

Girl Boss by Master Kama
地址：荃灣大壩街4-30號荃灣廣場4樓432號舖

文：Joy