由歌手張敬軒主理嘅仙后餐廳將於1月17日正式開業，開飯仔搶先喺餐廳開業之前同軒仔做採訪以及拍攝餐廳嘅主打菜式，唔講咁多，即刻入題！

仙后餐廳曾於1967年喺九龍彌敦道胡社生行開業，當時係香港第一家旋轉餐廳，風頭一時無兩。軒仔就想將昔日嘅香港濃情重現，從裝潢、傢俬、餐具、食物、音樂等方面都打造出懷舊味濃嘅香港餐廳。

逾千呎嘅新餐廳，主要分為fine dining及bistro小酒館兩個部分，另有酒吧、蛋糕店以及古董店。逐part介紹番，餐廳與從前嘅舊店一樣，主打法國菜。聽似普通，但原來傳統法國菜嘅烹調手法，香港並不常見。軒仔指出，「傳統法國菜非常重視食材質素，並且多以慢煮手法烹調，菜式中亦多以酒精入饌，調味亦因而比較濃郁，同而家食到嘅法國菜係有分別的。」

Fine dining及bistro小酒館餐廳嘅菜式均由曾經喺米芝蓮九星法國名廚Alain Ducasse餐廳工作過嘅行政總廚Antoine Michelson（下圖）構思，而二廚啊Will及甜品師Mandy都分別喺半島酒店及法國名廚Joel Robuchon餐廳工作過，菜式質素有保證之餘，仲夠晒法式風味。

Fine Dining

fine dining走嘅係華麗路線，品嚐5道菜晚餐之餘，仲可以聽到不同歌手嘅現場演奏，有時係法國音樂香頌（chanson），有時係英文爵士樂，有時會係香港以往粵語片嘅歌曲等等。

5道菜晚餐包括餐前小食、冷頭盤、熱頭盤、主菜、甜品、餐後小甜以及咖啡或茶，都幾豐富架，價錢為$1,388/位，另設加一！

冷頭盤（右）係法國海螫蝦配法國魚子醬，將海螫蝦拆殼起肉後加入檸檬汁、檸檬忌廉等配料，然後造成tartare，喺上層加入帶點果仁味道嘅法國Kristal Caviar魚子醬，最後以羅勒油伴碟，增添青草香氣；熱頭盤（右）係黑松露鵝肝焗通心粉，將牛奶、黑松露油、西芹頭、白汁、巴馬臣芝士等配料與通心粉拌勻，焗製後再配以新鮮黑松露、鵝肝就完成，口感好creamy，而且富有層次。

甜品有法國傳統甜品──意大利榛子小泡芙配牛奶榛子朱古力醬、香檳雪糕，採用意大利Piedmont渾圓又香脆嘅榛子，做成鬆脆又充滯榛子香氣嘅小泡芙，再喺泡芙唧入吉士醬、焦糖榛子醬及少許食用金箔，配以Valrhona出產嘅牛奶榛子朱古力醬，同埋自家製嘅香檳雪糕，yummy！

Bistro小酒館

而另一邊廂則走法式小酒館路線，風格較為輕鬆，有齊套餐及a la carte單點菜單，有頭盤有湯有沙律有甜品，主菜分魚類及貝類、肉類兩款選擇，遲下仲會推出素食菜單添！

以報紙製成嘅菜單，背面仲有1967年當年嘅新聞添！

呢道頭盤西班牙紅蝦刺身配小酸瓜洋蔥忌廉汁($150)，西班牙紅蝦鮮甜彈牙，加入蜜餞檸檬皮、橄欖油等配料，令紅蝦更鮮，味道亦fresh。

主菜焗大西洋三文魚配白酒汁青露荀($280)，煮法與其他餐廳有啲不同。大廚先將三文魚煎香，再以40度慢煮將三文魚慢煮約30分鐘，最後再曬香三文魚外皮，嫩滑得嚟又帶點焦脆。

甜品可揀選法式焦糖布丁配香檸貝殼蛋糕，薰衣草蜜糖($120)，經典嘅焦糖布丁旁邊，仲有加入檸檬汁、橄欖油、檸檬皮等而成嘅貝殼蛋糕，品嚐前唧入來自法國嘅薰衣草蜜糖，甜而不膩。

咪以為只有fine dining區先有音樂，喺小酒館嘅正中間擺放咗一部古董鋼琴，同樣可聽到琴師嘅即席表演架！

設於餐廳正中間嘅酒吧非常美觀，吧枱擺放咗以透石膏特別打造嘅雲石枱上，加入燈泡後令吧枱枱面都變得亮麗，尤如發光中的琥珀，令人驚艷。

古董店寄放咗不少軒仔私藏多年嘅珍貴古典小物，有1950年嘅Christian Dior嘅收藏品、18-19世紀嘅復古手繩、打字機、60-70年代嘅墨水筆等等,如果客人睇啱仲可以買走架！至於蛋糕店尚在籌備當中，軒仔打算除咗供應蛋糕，仲會有法式甜包、麵包、早餐、午餐、自家調配嘅咖啡等等呢類grab n go嘅輕食。

仙后餐廳
地址：灣仔皇后大道東213號胡忠大廈2樓
註：價錢以餐廳為準

文：Joy