如果有去過日本江之島嘅朋友，應該都會食過江之島人氣名物大手燒。馬鞍山最近就新開咗一間大手燒專門店，將原隻海鮮經燒烘加壓後製成仙貝，充份鎖緊食物鮮味，鮮味濃郁，口感酥脆！日本嗰邊傳統就會放八爪魚等海鮮，但呢度就有唔少自創口味，仲混合埋港式及台式元素！
店主特意購入的特製機器，加入海鮮及粉漿後壓製約兩分半鐘便完成。
軟殼蟹手卷就見多，軟殼蟹大手燒你有無見過？招牌軟殼蟹日式咖喱口味，將雞蛋、麵粉及木薯粉等材料混成粉漿，連埋原隻軟殼蟹壓成餅狀。蟹膏、蟹殼及蟹肉都保留到，鮮味十足，加埋咖喱粉就更惹味啦！
另外芝士櫻花蝦口味同芝士明蝦都係人氣之選，送酒一流，芝士控一定要試！
想有啲fusion 啲感覺，可以試吓台南蚵仔口味，加入原粒蚵仔，味道鹹香，有種食緊台南蚵仔煎嘅感覺，又幾有趣。
更多【新店直擊】： |
想食甜嘅口味，焦糖紫薯口味就啱你～加入自家磨製嘅紫薯粉，味道香甜有淡淡紫薯味，餅底不含動物成份，素食者都食得㗎。
另外呢個軟殼蟹牛油果漢堡都值得一試，軟殼蟹大隻多膏，配上紫洋蔥、大肉茄、生菜及秘製牛油果醬，好滿足！
地址: 馬鞍山鞍祿街18號新港城中心五期地下29號舖
文: Yanica
相、片: Tom Li