如果幸福係一種味道，咁就一定係令人開心嘅甜味！今日開始日本一間著名洋菓子店嚟到香港開Pop-up店，將皇牌系列包括蜂蜜栗子蛋糕同流心心太軟由神戶每日直送到港，呢份屬於日本嘅幸福滋味，而家去金鐘就買得到啦。
 

Königs-Krone已經有40年歷史，總店設立喺日本神戶，而品牌名係德文，意思係勝利嘅皇冠。從今日開始到6月4號，嚟太古廣場認住呢隻熊仔Pochi就代表搵到喇。
 

流心心太軟有兩款口味：黑朱古力同白朱古力，最抵讃嘅係價錢唔離地之餘仲可以喺Pop-up店即場請店員叮熱，或者帶返屋企用微波爐校500W叮25至35秒，就可以食到媲美餐廳即焗咁流心嘅心太軟！
 

綿密朱古力蛋糕配上唔太甜而帶可可香嘅朱古力漿，無論口感定味道都非常夾，細細件最啱下午茶配一杯熱茶或者一球凍嘅雪糕嚟食。
 

而另一推介就係佢地嘅皇牌蜂蜜栗子蛋糕，無論口味定包裝選擇都非常多！首先係最啱送禮用嘅瓷壺木盒裝，裡面嘅日本製高溫瓷壺可以用嚟直接焗蛋糕。另外仲有瓷壺裝同紙盒裝，分別都有朱古力同抹茶兩款口味。
 

用家人朋友分享嘅就可以改買杯子蛋糕包裝，唔單止細細杯方便食，而且除咗大熱嘅朱古力同抹茶口味之外，仲有日本人氣焦糖口味，同紅茶、咖啡、柚子共六款口味任揀。裡面一樣有原粒日本栗子，風味十足。
 

迷你牛油蛋糕喺日本亦相當受歡迎，有朱古力、蜂蜜栗子、原味提子同人氣抹茶紅豆四款，一樣係紙盒包裝細細件，可以室溫或者叮熱享用。
 

最後仲有唔少禮盒選擇，例如皇冠精選嘅罐外面印上得意熊仔Pochi圖案，裡面仲有六條迷你版香脆棒棒酥同3條蜂蜜蛋糕。另外亦有朱古力脆米、貝殼蛋糕、比利時朱古力薄脆等。甜魔們準備好你地嘅甜品胃未？

Königs-Krone
*即日起至2017年6月4日期間限定
地址：香港金鐘道88號太古廣場L1層
營業時間：11:00 - 20:00

文、相：Cathy