近年越嚟越多網店主打鬆餅，其中呢間更喺中環開Cafe。每日新鮮出爐嘅鬆餅限量100件，未開門就有人排隊嚟買！手工鬆餅出色之餘，仲有Bagel、捲蛋等多款糕點，飲品亦有水準，加上Cafe樓高兩層之餘又有花藝擺設，好啱嚟食下午茶呀。
 

Loft & Scone係網店& Scone嘅首間實體店，店主希望將好味嘅鬆餅帶到大家嘅日常生活當中，例如配咖啡就係Coffee & Scone，一邊睇書一邊食就係Book & Scone。而由於中環店有個閣樓，新店就取名為Loft & Scone喇。Cafe裝修以白色同木為主，店內花藝就嚟係Lejardin同S.flowery等本地小店嘅作品。
 

Scone Set（$68）

店主喺旅行嘅時候食過非常好食嘅鬆餅，返到嚟香港就自己研究食譜，最後做出佢心目中嘅理想口感：外脆內鬆，唔會太乾或者一咬就散開。選用日本雞蛋同北海道麵粉製作，帶淡淡麵粉香嘅同時仲會咬到小麥顆粒。鬆餅每日限量100件，每日出爐時間不定，想食嘅話建議大家盡早嚟。
 

Scone Set係兩件鬆餅配自家製馬斯卡彭忌廉同無花果醬，因為店主覺得Clotted Cream太Heavy，所以改用Mascarpone芝士自己調配出有奶香同時口感輕盈嘅忌廉。而果醬就係自家製、帶有果籽嘅無花果醬，清甜唔膩。
 

Mentaiko & Cheese Bagel（$42）

另一主打係自家Bagel，同樣用北海道麵粉製作，經過比例調配，焗出煙韌、又不失柔軟彈性嘅口感。口味偏日式風格，例如拍攝呢款就用咗鹹香微辣嘅明太子配搭芝士，惹味醒胃。
 

Burrata & Maple Syrup Croffle（$98）

近期大熱嘅Croffle呢度一樣有，用牛角包壓成酥脆窩夫後，加上新鮮Burrata芝士同車打芝士，前者係流心水牛芝士，濕潤柔軟奶味濃郁，後者就增加鹹香。配搭一小壺楓糖漿，可以按自己喜好淋喺芝士上面，鹹甜交織味道豐富。
 

 

Okinawa Black Sugar Kinako & Mochi Roll Cake（$58）

忌廉捲蛋當中就以呢款配搭黑糖漿同麻糬嘅最吸引，蛋糕體鬆軟唔乾，黃豆粉忌廉甜度適中，自家製豆乳麻糬口感偏軟。而黑糖漿用日本沖繩黑糖製作，甜而不膩而且帶獨特天然焦糖香氣。
 

Hojicha Latte w/ Okinawa Black Sugar Jelly（$60）

飲品亦見心思，選用靜岡焙茶沖調，味道濃郁帶烘焙香氣。加上自家製沖繩黑糖啫喱，微甜Q彈可以平衡焙茶嘅微苦，同時帶出甘香。
 

Pandan & Coffee Tonic（$50）

而家用嘅House Blend咖啡豆係三個唔同產地嘅拼配，之後會按時令更換，令咖啡味道同香氣都相對平衡，可以配搭店內唔同糕點。而呢杯Coffee Tonic更特別加入班蘭糖漿，味道清香又有氣泡口感，夏天飲特別爽呀。
 

Loft & Scone
地址：中環機利文新街6號地舖

文、相：Cathy.H