早訂早享受米芝蓮星級餐廳推介！

2018年米芝蓮指南港澳版早前已經出爐啦，係咪想試吓星級餐廳先？開飯仔就精選咗幾間酒店餐廳俾大家，趁聖誕節豪食一餐都唔係好過份啫。溫馨提示，以下餐廳仲可以用OpenRice網上訂座，click一click即可訂位，只要出席即無條件送「亞洲萬里通」25里數，慳返啲時間仲有得賺里數添！

全球最高意菜 Tosca

位於全世界最高酒店入面嘅意大利餐廳，行入去已經有種居高臨下嘅感覺。菜式方面主打意大利南部菜，好似生紅蝦薄片、小龍蝦餛飩、乳鴿胸同栗子奶凍。主廚Pino Lavarra擁有超過30年入廚經驗，擅長以創新嘅烹飪手法炮製美食。

得獎菜式配佳釀明閣

曾多次獲米芝蓮星級榮譽嘅中菜廳，主打高級粵菜同點心。餐廳特別設有酒窖，收藏超過400枝來自20幾個國家嘅靚酒。招牌菜有濃湯花膠雞絲羹，曾經攞過香港旅發局美食之最大賞金獎。其他菜式好似松露金縷衣、海生蝦炒蛋白同龍皇披金甲都值得一試。

復古典雅手工菜嘉麟樓

除咗年年中秋都瘋魔全城嘅奶黃月餅外，點心同粵菜質素同樣超班，蜜汁叉燒酥、北京片皮鴨、桂花燒乳鴿同擂沙湯丸都係必點之選。裝修走復古風，仿照酒店喺1928年開業時嘅裝潢，有木屏風、彩色玻璃同古董藝術擺設等裝飾，感覺優雅。

連續三年摘三星唐閣

今年已經係第三年獲選為米芝蓮三星食府，全球只得四間中菜廳攞到架咋。總廚鄺偉強師傅堅持用最新鮮嘅食材入饌，烹調出正宗粵菜。招牌菜有釀焗鮮蟹蓋、三葱爆龍蝦、砵酒焗生蠔、蜂巢煎封銀鱈魚同金錢鮮蝦球等。

澳門一星粵菜麗軒

過大海除咗食豬扒包同葡撻之外，試下粵菜都唔錯架。呢間全澳門最高嘅中菜廳，推介蜜燒西班牙黑豚肉叉燒、香焗鮑魚燒鵝酥、花雕蛋白蒸鮮蟹鉗同竹筒花膠海底椰燉雞湯等。主廚傅文彪師傅曾經喺香港天龍軒工作，水準有保證。