相信大家對呢間甜品舖都唔會陌生，耐唔耐就見到佢哋同啲卡通人物聯乘，出好多得得意意嘅馬卡龍、卷蛋之類嘅甜品，早排仲引入埋日本嘅cremia雪糕同蘋果批等等，最近又有新搞作，就係終於開一間有座位嘅堂食café啦~

新café位於旺角嘅新商場，平時有開嘅甜食、生果當然唔少得啦，另外仲新增咗啲鹹點menu同埋疏乎厘pancake、芭菲類嘅甜品呀咁。首先要介紹嘅梗係大家都飛佛嘅疏乎厘pancake啦。加上呢期北道蜜瓜當造，就梗係揀蜜瓜梳乎厘啦，一份兩件綿密鬆軟，都幾有空氣感梳乎厘pancake，仲配埋cremia添~

一次過食兩款蜜瓜甜品都唔係好過份啫，可？Cremia北海道蜜瓜芭菲個底，有好多粒真‧蜜瓜果肉，加埋cream呀、粟米片呀，最重要嘅cremia呀，奶味香濃，口感又豐富，肥呢家嘢，食緊嘢嗰陣唔好同我講住。

Bocca嘅千層忌廉蛋糕大家都可能食過，牛奶味幾香，厚厚der cream係忌廉控嘅大愛，新店就推出咗個升lvl版，中間夾咗奇異果呀、芒果呀、士多啤梨呀等等嘅鮮果肉落去，雖然千層嘅班戟皮少咗，但口感同顏色都豐富咗。

 鮮雜果比利時窩夫

講咗咁多甜嘢，講返樣鹹嘢啦。Menu上有飯有意粉有拉麵嘅，其中呢碟北海道豚肉腸咖喱蛋包飯，個咖喱汁底係幾香甜，而且冇乜辣度，唔食得辣嘅朋友仔都唔使驚。

飲品方面，由於餐廳兼賣日本鮮果，所以都有幾多果系飲品呀，好甜嘅不妨try try玫瑰荔枝茶或者白桃益力多沙冰。前者仲有一片片散落嘅玫瑰花瓣，賞心悅目。講多樣小秘密大家聽，聽講佢哋嚟緊會同其他卡通聯乘，由裝修到食物造型都係影相呃like嘅設計，至於係邊隻卡通，就要等消息啦~~

山下菓子
地址：旺角彌敦道700號T.O.P This is Our Place 3樓315號舖

文、相：Kar