放暑假去邊hea？如果你係蛋黃哥嘅粉絲，毫無懸念，一定係去旺角！點解？你哋本命蛋黃哥呢排駐旺角呀，喺大型商場內搞咗個「精選美食節」，有7間舖頭參與，鹹甜點都有得食！
Smile Yogurt
夏天總係會想食雪糕，呢檔有蛋黃哥乳酪雪糕，一層芒果一層乳酪雪糕咁，蛋黃哥再施施然咁坐喺面，搖一搖杯佢仲震騰騰咁，單係呃like度都已經夠晒高。
如果嚟唔到，都唔會同蛋黃哥緣慳一面嘅，叫friend子帶呢個戚風蛋糕畀你啦，有迷你版同6吋版揀。一樣咁cute~
Homie Cookies
欣宜嘅曲奇餅店都有參與，仲特製咗個梳乎棉花糖流心芝士鹹蛋黃撻，啱啱出爐嗰陣咬開啲芝心鹹蛋黃緩緩流出，都咪話唔疏乎。
蛋中蛋朱古力都好過癮，敲敲個殼裡面就係蛋黃哥啦。
當然唔少得招牌曲奇啦。鹹蛋黃口味嘅曲奇一樣變咗身做蛋黃哥！
山下菓子
對於呢個品牌，大家應該都相當熟悉。除咗有佢哋一貫嘅馬卡龍之外，今次仲有懷舊大菜糕、巨型砵仔糕、楊枝甘露、糖蔥餅、手工雪條連DIY模具呀。全部都好cute cute。
GUSTEAU’S HONG KONG
呢間有蛋沙律熱狗、香辣蜜糖雞肉腸、蛋沙律同香橙特飲賣，造型可愛，最特別係杯嘢飲識得發光㗎，因為有粒蛋黃哥夜光冰喺入面呀！
CheckCheckCin
追求健康嘅朋友，如果以上嘅嘢你都怕肥，米水同茶療一定啱你。蛋黃哥化身成醫師，根據「不瘦降」、「玻璃心」、「扮工失調症」等6大都巿症狀，提供6種「治療」嘅米水、茶療，仲送埋個保溫樽，是咪好治癒先？
而本身都喺商場內嘅呢間café，就推出咗蛋黃哥芒果蛋糕同埋「蛋黃哥午後輕食配北海道赤肉蜜瓜雪糕」。
至於呢間甜品舖，就有奶蓋芒果冰、布甸同楊枝甘露，全部都有蛋黃哥喺度㗎，最得意就係個布甸，佢匿埋咗入隻蛋裡面呀！
期間限定：即日起 至 9月2日
地點：旺角朗豪坊4樓通天廣場
文、相：Kar