夏日炎炎唔單止正好眠，亦係品嘗各間餐廳各款季節清新Menu嘅最佳時機！呢間連鎖咖啡店當然都唔例外，佢地即將推出兩款夏日星冰樂飲品，同一系列以環保海鮮為主嘅清新輕食，今個夏季絕對可以食得Fresh啲！
 

星巴克咖啡即將喺7/6推出兩款夏日星冰樂，抹茶伯爵啫喱星冰樂以抹茶星冰樂為本，加入伯爵茶糖漿、伯爵茶啫喱同鮮忌廉，賣相睇落層次分明，搞勻嚟飲味道就以伯爵茶為主，稍嫌抹茶味道唔夠突出。不過應該就係各位伯爵茶Fans嘅「Cup of tea」喇。
 

另一杯愛爾蘭忌廉咖啡布丁星冰樂就以咖啡星冰樂為本，配搭愛爾蘭咖啡忌廉糖漿、咖啡布甸同特濃咖啡鮮忌廉，最後撒上土耳其咖啡粉做點綴。飲落咖啡香十足，軟滑布甸亦增加口感。
 

唔講都唔知，原來香港係亞洲人均海鮮消耗量第二高嘅地區，為咗推動海洋可持續發展，星巴克咖啡今次同世界自然基金會合作，特別選用該會海鮮選擇指引當中嘅環保海鮮嚟設計一系列嘅食物，同樣係7/6推出。
 

當中配搭最吸引嘅就係呢個檸檬蒜香大蝦牛油果醬三文治，麵包先抹上牛油果醬，再放滿蔬菜同檸檬蒜香大蝦。配搭清新，大蝦亦相當彈牙，如果牛油果醬可以再多少少就更好喇。
 

另一夏日Refresh之選係泰式大蝦青木瓜沙律，泰式醬汁酸辣得宜，配搭清新木瓜絲、蔬菜同大蝦，非常醒胃。
 

環保海鮮系列仲包括全新嘅千島醬大蝦菠蘿沙律烤卷，同改用挪威環保三文魚入饌嘅三文魚蘆筍蛋批同三文魚忌廉芝士三文治。醫肚同時更為支持海洋保育出一分力。
 

文、相、片：Cathy