如果大家有印象，上年有幾間漢堡店都以爆多餡料成為香港人嘅飛佛，例如有軟殼蟹鵝肝漢堡呀、龍蝦漢堡呀咁，啲料大份得嚟仲要係高級食材，有啲仲成功入選成為開飯熱店！而嚟到2016年嘅年尾，又有幾間漢堡店跑出，不過佢哋未必再係以高級食材去取勝，而係大玩各種gimmick！
爆長魚柳漢堡 Urban United Burger & Bar
呢間喺元朗嘅漢堡店，繼承咗元朗超長魚生壽司嘅傳統，做咗個超長魚柳漢堡！佢哋個阿拉斯加特大魚堡，條魚柳係長到兩邊都突晒出嚟，加埋流住嘅沙律醬，的確係幾吸引！平時成日發生食晒魚柳都未食晒個包嘅情況一定唔會再發生。佢個包仲要係搽咗牛油再烘到脆卜卜㗎補充返！
海膽黑松露漢堡 EC Kitchen
呢間漢堡店亦成功製造出驚人嘅視覺效果，將海膽同黑松露，兩樣香港人一聽到就雙眼發光嘅食材併埋一齊，而且相當足料！拎上手見到啲海膽多到瀉嘅感覺，係幾令人興奮嘅。海膽嘅甘香，配埋黑松露嘅香，令到成個漢堡都好香，呀仲有，塊牛肉都頗厚下，100蚊唔使就食到。
真‧和牛流心蛋漢堡 獅子樓
香港人唔知點解對住鰻魚同流心嘢就會即刻冇晒抵抗力，呢度嘅漢堡就中晒呢兩個point。一個鰻魚滑蛋漢堡，一個吉列和牛流心蛋漢堡，而且兩個burger都暗藏玄機。前者鰻魚固然夠香，但原來個包都做過手腳，混埋咗蕃茄一齊整，淨係食個包都食到蕃茄味，減低咗鰻魚嘅油膩感；而流心蛋嗰個爆多蛋汁，吉列牛用嘅仲要係澳洲M5和牛，牛肉味重之餘，食得返一片片和牛出嚟，而唔係平時免治肉餅。但當然，價錢都相對較貴啦。
索汁饅頭漢堡 The Beef & Leaf
唔好睇佢雖然喺旺中商場嘅角落頭位，但係做出嚟嘅漢堡絕對係有酒店嘅級數，因為師傅係前酒店嘅西餐總廚嚟，所有漢堡嘅醬汁都係佢自己調製㗎，好似咕嚕、沙爹同芒果汁咁，係幾特別，仲有邪惡代表芝士流心蛋漢堡，好鬼juicy！留意返呢度漢堡最大嘅特色，係佢哋用饅頭嚟做一底一面嘅包，中西合璧之餘，重點係饅頭比一般食開嘅漢堡包容易索汁呀！細細聲講你知，老闆係陳柏宇同大隻仔趙勁皓呀！
吸睛Tiffany Blue 漢堡 Burger Jobs
話佢係「外貌協會」會長應該冇人會反對，淨係睇見tiffany blue嘅漢堡，女生都已經心心眼啦，最啱就係擺IG呃like。不過呢個burger唔係淨係得樣㗎，仲好有內涵，塊炸雞扒輕輕一切，入面嘅芝士就即刻爆漿咁湧出嚟喇，吸引到呢。
文、相、片：Kar
其他最新飲食潮流：
旺角掃街新誘惑 一啖一粒多汁芝士海膽蘑菇（有片）
小丸子Cafe登陸 觀塘超萌貓咪造型抹茶咖喱飯（有片）
Hea住過聖誕！聖誕限定梳乎蛋系列
隨時接收最新資訊
讚好OpenRice專頁！