素食文化喺香港愈嚟愈流行，多咗素食餐廳之餘，好多餐廳亦開始加入素食餐單。不過依然都有部分人覺得食素好寡。最近有隻新嘅植物肉引入香港，可塑性高，配搭唔同食材都啱，或者可以打破大家對素食固有嘅諗法。

呢款植系肉（The Vegetarian Butcher）嚟自荷蘭，由出身自畜牧農業世家嘅Jaap Korteweg創辦。經過多年努力嘅研發，終於以粹取營養植物中嘅豐富蛋白質為原材料，再以獨特技術還原肉類嘅質感，製出呢款植系肉。今次引入香港，就搵嚟城中7間人氣餐廳合作，推出多款以植系肉入饌嘅期間限定菜式，中西式都有，肉丸、雞肉漢堡、牛肉漢堡等等都做到出嚟！

一向都支持素食嘅梁祖堯，亦有試食過其中幾間餐廳嘅菜式：「呢款植系肉畀廚師嘅發揮空間好大。」祖堯最欣賞嘅係Appendix Coffee & Bar 嘅羅勒醬植系雞肉意粉，「你唔會覺得自己喺度食大豆素雞肉，佢裡面連纖維同肉汁都有！」

 羅勒醬植系雞肉意粉

Appendix Coffee & Bar另一道菜式係西班牙植系肉丸，口感同平時食開嘅分別唔大，濕潤多汁，配埋茄醬、脆多士一齊食，又幾香口。

 西班牙植系肉丸

Barista Caffe 嘅植系雞肉意大利飯亦值得一試，雞肉質感嫩滑，蘑菇白汁調得啱啱好，risotto黏黏地又有嚼勁。素食都可以係一種享受。

 植系雞肉意大利飯

NOSH 則有3款植系肉菜式，包括海鮮醬植系肉丸炒麵、粟米莎莎醬醃植系雞肉漢堡配糙米飯同黑椒植系牛肉漢堡飯。想試素食但平時又偏好濃味食物嘅朋友，試黑椒植系牛肉漢堡嗰款就啱晒，黑椒味重，肉質實淨。

 黑椒植系牛肉漢堡飯

祖堯分享：「食植系肉嘅時候，你唔會只去諗佢到底係咪似真嘅雞肉，但佢可以帶到雞肉帶嚟嘅滿足感，我自己食嗰陣係滿足嘅。」另外祖堯亦鼓勵大家可以多啲食素，「你唔使做一個全素嘅素食者，但我覺得素食要喺你心入面佔一席位。佢應該係神聖、重要、期待嘅。如果你開始素食，即係你開始重視植物帶畀你嘅食物，然後你會重視我哋嘅土地可唔可以種出植物，你就會同呢個地方有一個更真實嘅連結。」

另外4間餐廳包括Blend & Grind、The Butchers Club、囍公館同埋Urban Coffee Roaster。

 鮮無花果植系咕嚕肉 - 囍公館

文：Kar
相、片：Tom Li