天后呢間新店好受歡迎，唔單止因為旺中帶靜嘅地段加上工業風裝修非常討喜，亦因為係Pet-Friendly餐廳，可以帶自己嘅毛孩嚟之餘，不時仲可能會見到店主狗仔小B！食物選擇亦相當豐富，豐盛嘅全日早餐、特色甜品，到精品咖啡一應俱全。
 

Superhooman係西九文化區Hooman嘅姐妹店，一樣係寵物友善餐廳，亦有供應招牌美式熱狗同旋卷薯條，唔同嘅係天后新店選擇更多元化，好似經典全日早餐新增素食選擇，亦有更多輕食同甜品！裝修配合返進駐嘅精品酒店風格，以工業同簡約為主，加入大自然元素。
 

牛油果班尼迪克配醃三文魚（$118）

Eggs Benedict嘅主角當然係水波蛋，切開夠流心嘅同時蛋香亦非常濃郁，配搭Creamy嘅牛油果同荷蘭醬真係無得輸嘅配搭。麵包外皮煙韌裡面鬆彈，而醃三文魚亦鹹香有致，連埋中間嘅乳酪同魚子醬一齊食更香口。
 

SuperHooman豐盛早餐（$138）

最受歡迎嘅全日早餐，有牛油果沙律、炒蛋、波特菇、車厘茄、薯仔粒、焗豆、薯餅、煙肉、香腸，同竹炭包。黑色嘅竹炭包鬆軟彈牙，炒蛋香滑，波特菇肉厚多汁，其他配料亦有水準。值得一提嘅係可以改為素食版，即係無咗煙肉同香腸而其他配料分量加大。
 

鬆軟小班戟配山楂士多啤梨汁及雪糕（$98）

賣相超吸引嘅打卡甜品！靈感源自Dutch baby pancake，之前喺西九店特別製作成方便食嘅Bite-sized，天后新店就將迷你班戟同香蕉片圍成一圈，淋上自家製嘅山楂士多啤梨汁，再配雪糕同鮮果。班戟蓬鬆軟彈，趁微熱嘅時候點埋雪糕一齊食口感刺激。山楂士多啤梨汁酸酸甜甜，令整體甜而不膩。
 

西班牙油條配朱古力醬及雪糕（$78）

同樣係西九店帶過嚟嘅甜品，即叫即炸嘅西班牙油條香脆而唔油膩，上面灑滿砂糖粒，一方面更香甜，另一方面亦增加咗顆粒口感，就咁食都好過癮，當然配埋雪糕就豐富啦。
 

 

Latte（$36/熱，$42/凍）

選用本地烘焙嘅精品咖啡，拼配巴西及尼加拉瓜豆，帶杏仁同可可風味，口感柔滑。
 

Dusty Pink（$56）

以自家製玫瑰糖漿加上西柚汁調配，入口花香濃郁自然，絕對唔係香精味。加上粉紅色漸層好啱打卡！另外兩款特調就用咗新鮮水果製作，消暑一流。
 

其實餐廳唔單止係一間Cafe，仲特別請嚟著名調酒師Shelley Tai進駐，希望之後等限聚令解除，可以喺夜晚為大家奉上各款特色Coctails。
 

Superhooman
地址：天后清風街16號地舖

文：Cathy
相、片：Calvin Kwok