Soho區呢間新餐廳主打Fusion菜，招牌拉麵輪正宗或者比唔上各大日本過江龍，但勝在非常有誠意，麵條係用日本製麵機每日喺店門旁邊嘅麵房製作，保證新鮮。同時西式主菜亦有水準，話唔定就係你To-eat-list裡面嘅下一個目標。
 

Fuse Creations特別從日本入口呢部製麵機，據了解全港就得佢地同另一間日式沾面專門店有呢部機。餐廳每日中午製麵，客人可以從店外玻璃窗見到攪拌、發酵、壓麵、切麵等步驟。
 

每日鮮製麵條可以保持麵餅嘅濕度同韌度，因此招牌拉麵嘅麵條食落相當彈牙。湯底就用咗大量豬骨熬製八個鐘，味道濃郁而唔會太油膩。
 

辣味拉麵嘅湯底就改為九小時熬製嘅三黃雞湯配特製辣油，因為幼麵相當掛湯，而湯底亦有相當辣勁，平時唔食得辣嘅朋友仔都係建議食返招牌原味喇。
 

值得一提嘅係配料除咗有見慣嘅日式叉燒之外，仲有中式叉燒！日式叉燒食落鬆化有豬肉香，而中式叉燒比較厚身，肥瘦相間入口脂香更明顯。兩款叉燒都係用自家醬汁醃製，少少甜帶出叉燒肉香。配埋蛋黃流心誘人嘅溏心蛋，大滿足。
 

叫得做中西日創意料理，餐廳當然亦有西式菜式供應。西冷牛扒特別選用美國USDA頒發最高級嘅Prime牛扒，而且只用中間最嫩嘅部位，先以大火燒煮鎖住肉汁。配以秘製牛骨醬汁，牛香突出。
 

另外鱈魚就由澳洲入口，低溫煮過後再加牛油煎香，皮脆肉滑。點埋紅菜頭汁，味道更加輕盈，最啱夏天享用。搭配Parmesan Crisps同Gnocchi，味道同口感都更豐富。
 

唔單止菜式，連水果都可以彰顯出餐廳糅合唔同國家美食嘅特色。餐廳會挑選當季時令水果，例如最近就有日本巨峰提子、香印提子同台灣愛文芒！
 

Fuse Creations 
地址：中環伊利近街38號地舖

文、相、片：Cathy