開心，食甜品；唔開心，食甜品！無論咩時候都好，甜品總係可以為大家帶嚟好心情。最近澳門一間泡芙店嚟到香港尖沙咀開Pop-up店，細細粒嘅迷你泡芙唔單止賣相精緻，經過廚師調整甜度之後更啱香港人口味！
 

澳門法式閃電泡芙品牌Chop Chop最近嚟到尖沙咀K11開Pop-up店Buff，第一輪先推出六款唔同口味嘅法式迷你泡芙。最值得一讃嘅係廚師保留法式甜品一絲不苟嘅精神之外，曲奇皮裡面嘅忌廉亦經過改良，創出唔同口味而且食落唔會太甜。
 

當中人氣No.1嘅係藍莓泡芙，味道酸甜有致。草莓亦係最受歡迎嘅口味之一，脆薄曲奇皮同酸甜柔滑嘅士多啤梨忌廉非常夾。
 

朱古力係另一推介，富可可香而唔會死甜。午後奶茶特別在上面有滴管，裡面嘅奶茶可以隨意擠落泡芙裡面，亦可以就咁飲，茶香濃郁口感滑溜。
 

益力多上面嘅益力多啫喱特別畫上趣致圖案，同樣一咬開忌廉就會湧出嚟，滿嘴益力多甜香。而哈密瓜口味屬於期間限定。
 

雖然暫時只有以上六款口味，但負責人靜靜雞同開飯仔講，佢地亦努力研發緊更多港式新奇口味，例如好立克或者檸檬茶等等。而接住落嚟亦會有更多期間限定口味推出。Pop-Up舖仔座位唔多，有心想試嘅不妨自攜冰袋帶返屋企，慢慢享受呢份法式甜美！
 

BUFF
地址：河內道18號K11地庫1樓14舖
營業時間：11:00-21:00

文、相：Cathy