近年香港興起生酮飲食減肥法，係一種吸收高脂肪、適量食蛋白質同少食糖嘅減肥方法，仲有好多成功例子。不過因為呢種減肥方法要減少吸收碳水化合物同糖，所以對於用呢種方法減肥但又想出街食飯嘅朋友就有啲唔方便。不過原來香港已經愈來愈多主打生酮飲食或供應生酮餐單嘅餐廳，對用緊生酮飲食減肥嘅朋友簡直係一大喜訊！
波希米亞風咖啡店 角落咖啡廳 
中環蘭桂芳嘅一間波希米亞風Cafe，因為餐廳老闆Jeffrey曾經用生酮飲食大減40磅，所以就開設咗呢間特設生酮選擇嘅咖啡店。首先講下杯Keto Coffee，加入椰子粉同牛油製成，飲落椰子香濃厚，口感滑溜。食物方面不定時推出新菜式，好似早幾個月就推出三款生酮新菜單，如黃薑帶子椰菜花飯同美國肉眼扒配椰菜花飯，椰菜花飯炒得好香口，同食真炒飯個口感好相似，另外意式香草烤慢煮雞胸肉伴三色蔬菜嘅雞胸都煮得幾滑，配埋三色蔬菜營養夠晒均衡！仲有多款生酮甜品如生酮芝麻巴斯克芝士蛋糕等，想打卡又減肥中嘅朋友必去。
圖: 生酮概念酒吧 The Wall Street Bar & Lounge
有冇諗過減肥都可以飲酒？原來尖沙咀有全港首間生酮概念bar and lounge，首創生酮Sugar-free Cocktails，等大家減肥嘅時候都可以同朋友gathering～另有專為生酮而設嘅Keto五道菜晚餐，是日餐湯、前菜同甜品會不定時更換，另外三味生酮麵包，麵包口味有芝士、合桃同番茄，外層烤得香脆，而內裡唔會太乾，絕對可以一解麵包癮。主菜方面就三選一，包括用黑松露寶雲酥焗三文魚配蒜辣意瓜面、烤12oz美國肉眼配生酮薯條同開心果脆皮烤羊架伴蔬菜。黑松露寶雲酥焗三文魚配蒜辣意瓜面用櫛瓜取替意粉，吸收晒醬汁一樣咁惹味。生酮薯條都值得一試，用椰子粉製成，依然做到外脆內軟效果！溫提想食呢個套餐記得早一日訂定呀。
圖: 針車行變身咖啡店 So Coffee & Gin
深水埗係文青咖啡店嘅集中地，呢間Cafe前身係一間有70年歷史嘅針車行，保留返唔少舊有嘅縫紉針車，幾有風味，而且仲係一間Keto Friendly嘅咖啡店！餐牌上無論係Keto咖啡、Keto麵包、Keto麵食同Keto沙律都有得揀，如Keto版黑毛豬叉燒滑蛋三文治，包身用杏仁粉製成，烘得香脆，配埋用黑毛豬製成嘅叉燒同埋滑蛋簡直一流。麵食就推介香煎虎蝦翠玉麵配蒜香半乾蕃茄果仁醬，翠玉麵口感都幾似意粉，蝦肉都好彈牙～Keto咖啡就有焦糖、榛子同bullet三款味道，真係唔怕冇嘢啱食！
圖: 生酮漢堡系列 樺得園
呢間漢堡店喺Keto界都幾出名㗎啦～因為好多時去食keto漢堡都係將普通麵包轉做keto麵包，但呢度除咗keto麵包外，仲可以將包身轉做牛油果、金文拔芝士或生酮waffle，勁多選擇！餡料就推介飛驒牛漢堡，選用來自日本中部岐阜縣嘅黑毛和牛，牛味比一般和牛更濃郁，肉質細膩入口即溶。不過提提大家食漢堡記得走埋醬呀～
圖: 文: Yanica
