愛食日本菜、特別係海鮮嘅朋友注意！就日本日前公布嘅福島核污水排放計劃，香港政府宣佈禁止福島、東京等 10 個都或縣嘅水產進口。想知邊 10 個地方？買手信有無問題？對香港嘅日本菜餐廳影響有幾大？即睇內文：
 

8 月 24 日起，源自福島、東京等 10 個都或縣水產品禁止進口本港（資料圖片）

日本水產禁令常見 Q&A

 
Q：禁令幾時開始？詳情係點？

A：香港特區政府因應日本福島核污水排放，基於預先防範原則，今日（8 月 23 日）刊憲，由 8 月 24 日開始，禁止源自東京、福島、千葉、栃木、茨城、群馬、宮城、新潟、長野和埼玉共 10 都或縣嘅水產品進口本港。包括所有活生、冷凍、冷藏、乾製或以其他方式保存和水產品、海鹽，以及未經加工或經加工嘅海藻。
 

Q：禁令有無限期？

A：環境及生態局局長謝展寰指有關禁令持續幾耐，要視乎日本核污水排放之後嘅具體實際情況，同日本政府的監察系統。現時未有充足資料及證據，因此並無既定時間表。
 

香港有超過 2,500 間日本菜餐廳（資料圖片）

 
Q：點解係呢 10 個都／縣？

A：謝展寰局長指今次係將一啲沿海高風險嘅縣份，同一啲接連嘅縣份都包括喺禁令之內。對於香港居民而言係一個保險嘅做法，希望可以向市民保證，入口香港嘅所有日本食品，都一定係安全嘅，可以放心食用。
 

Q：喺香港食日本進口海鮮安唔安全？

A：謝展寰局長表示食物安全中心會喺進口層面做好把關工作，加強對日本進口食品檢測，雙重保障日本進口食品安全。六月中起已經全面提升就日本進口食品嘅檢測範圍，檢測所有由日本進口各位水產品，及加強檢測其相關加工食品。
 

Q：去東京等地買嘅手信可唔可以帶返嚟香港？

A：謝展寰局長稱個人帶少量入境係不受法例管制，但屬禁令範圍嘅水產同相關產品有存在風險，建議市民唔好帶有關產品返香港。
 

對本地日本菜餐廳影響有幾大？

香港有超過 2,500 間日本菜餐廳，今次禁令會對佢哋營運有幾大影響？申子居酒屋負責人 Hei 接受訪問，指出今次禁令對佢哋餐廳影響暫時唔大，因為申子居酒屋大部分食材都嚟自北海道。

少量嚟自禁令範圍嘅海鮮，之前得悉政府有可能頒發禁令後，亦立刻改用其他地區嘅出品。Hei 認為福島核污水排放新聞發佈後，短期內對餐廳生意會有一定影響。但因為唔少港人都特別鍾意食日本菜，而且市民喺得知更多相關消息後，會理解其實影響唔係太嚴重。
 

申子居酒屋招牌菜極上蟹膏蟹肉燉飯，及申子海膽和牛燒（圖：Krystal030）

旗下有超過 20 個品牌，包括廚師發辦、鐵板燒、壽喜燒等餐廳嘅天大集團控股有限公司（飲食集團）負責人 Johnson Wong 接受訪問時亦表示，旗下日本菜餐廳大部分食材並非嚟自禁令範圍，所以禁令對於海產供應嘅影響唔大。而面對今次禁止入口指定都縣水產，Johnson 指餐廳前線職員會同客人解釋，政府有監管海產嘅來源同品質，以及餐廳都非常著重產地同來貨嘅質素，務求令客人增加信心。

而生意方面，Johnson 坦言近期生意下跌同日本福島核污水排放計劃無關，因為香港人非常鍾意日本食品，對日本進口食材嘅品質都有一定信心。營業額下跌主因，在於通關後本地消費意欲下跌。
 

位於銅鑼灣嘅 Omakase 餐廳 Sushi N 推出晚市二人惠顧、第二個套餐可享半價優惠，以吸引客人

帝逸酒店則表示為保障食客安全，帝逸酒店日本餐廳源峰早於三個月前，停止進口受影響都縣嘅水產食材，以保證所有食品符合安全規格。餐廳主廚會從世界各地搜羅時令優質食材，繼續以其擅長嘅傳統日式烹調手法，呈現出匠心巧製餐饗，令每位食客可放心享受前所未見嘅嶄新東瀛味道。
 

源峰日籍主廚將於 8 月 28 日首次聯同逸軒中菜行政總廚攜手推出全新四手聯乘中日菜單，為食客送上與別不同嘅餐飲體驗

文：Cathy.H

資料參考：香港特別行政區政府新聞公報，香港電台