香港人鐘意去東京築地市場食海鮮，連帶近年有唔少海鮮概念店開幕。不過其實對於唔少鐘意食海鮮嘅老饕嚟講，鴨脷洲先係佢地心目中嘅港版築地。去鴨脷洲市政大廈唔單止可以喺街市搵到香港漁民自己經營嘅海鮮檔，上多層去到熟食中心仲有大排檔。佢地可以將海鮮變成一碟碟熱辣辣嘅菜式，話係香港版嘅築地場外市場都不為過。
粒粒金黃西多 耀記咖啡
單睇檔名仲以為係普通茶餐廳，但其實同時亦歡迎買海鮮畀佢地加工。等食海鮮嘅時候想試下其他嘢先？無問題，一般茶餐廳食開嘅早餐茶餐炒粉麵飯一樣有，最多食客會食嘅包括呢碟成座小山咁嘅粒粒西多士，粒粒炸至金黃色，加埋煉奶同牛油，無得輸。
香脆酥炸三寶 陳新記
海鮮除咗清蒸、避風塘、豉椒炒之外，其實仲有唔少烹調方法，例如炸。呢間一樣可以加工海鮮同有粒粒西多食，但嚟到不如試下其他檔口無嘅炸三寶。三寶分別係魚皮、魚片頭同雲吞，炸魚皮香脆鬆化，炸魚片頭外脆內彈牙。熱氣？一餐半餐唔緊要啦。
更多【熟食中心尋寶】： |
茶記粉麵粥品 德發大排檔
無獨有偶，呢間一樣大排檔有得做海鮮加工，晚市仲有唔少小菜選擇。不過午市或者茶市嚟嘅話，佢地仲有熱辣辣軟綿綿嘅三拼粥、香料味十足嘅滷水鴨米線、甚至係茶餐廳式嘅公司三文治同西多士都有得揀。
圖：阿丸
同以上三間檔口唔同，呢兩檔只做晚市，主要做海鮮菜式同小炒，一樣無任歡迎大家落地下街市揀啱海鮮再畀佢地加工。咁點揀好？珠記比較有名氣，但最近多咗食家話佢地服務態度麻麻；栢記口碑爭少少，不過佢地嘅小炒皇同炸大腸都唔錯。其實呢兩檔一到週末夜晚都相當旺場，邊檔有位就坐邊檔啦。
文：Cathy