有唔少朋友都鍾意食魚，但除咗酸菜魚、烤魚之外，香港相對上比較少以魚肉為主題嘅餐廳。炮台山最近新開咗間小店，以創新手法將魚肉混入多款小食同麵食中，既有新鮮感，又有鮮味！由早餐、午餐到晚餐都有唔同嘅選擇。

餐牌內大約有70%嘅菜式都加入魚肉製作，包括「薯條」、「Nachos」「意大利飯」等等，全部都係魚！一條條嘅炸魚無薯條就咁睇落同快餐店嘅薯條冇咩分別，但一咬開就發現完全冇薯仔嘅成分，而係炸魚肉！煙煙韌韌咁，不過係幼咗少少。仲有3款自家調配嘅醬汁可以揀，分別係明太子加蟹子嘅雙子醬、蟹皇醬同松露醬，雙子醬最香，而蟹皇醬則可以提升魚肉嘅鮮香。

扮墨西哥魚皮，即係扮Nachos啦。自家炸嘅魚皮夠晒香脆，點埋牛油果醬、肉醬同蕃茄莎莎醬係幾惹味，會食到唔停口。

 炸魚狗腸

魚麵有兩款，湯麵或撈麵，各有特色。湯底以九棍、紅衫、門鱔、剝皮大眼魚等熬煮9個鐘而成，米白色嘅魚湯味道清甜。黑白鴛鴦春卷爽彈魚麵就成碗都魚啦~ 一款係魚肉春卷，一款係墨魚肉春券，魚麵爽彈。

至於芝士汁吉列豬扒魚麵撈，有微微嘅芝士香滲出，麵質比湯麵更爽彈有嚼勁，仲有陣陣魚香。

但講到最特別嘅一定係夜晚6點後先有得食嘅魚米粒粒，英文叫fishotto。即係好似risotto咁，一粒粒「米」都係魚粒嚟，比米大粒啲，但就更彈牙更有咬口，魚香中又滲有松露香，幾值得試。重點係，呢幾款魚品輕食都冇乜魚腥味啊~ 怕腥嘅朋友仔都試得過。

魚事者
地址：北角炮台山宏安道14-28號威德閣地下14號舖

文：Kar
相、片：Tom Li