各位麵包控，特別係鍾意食牛角包嘅朋友應該都聽過品穀呢個品牌，佢地最近過海去到灣仔開全新概念店：集合無添加麵包、法式甜品，同港式茶飲三大品牌！概念店限定嘅朱古力檸檬酥同全新閃電酥係必試！
 

品穀概念店位於灣仔太和街，旺中帶靜。當中最特別嘅就要數到開放式烘焙工場，配落地大玻璃令大家可以欣賞到製作過程。概念店融匯「品穀」麵包、「Ma Douce」甜品同「茶品」茶飲三個品牌，同樣主打嚴選食材、無添加同手工製作概念。
 

新店限定閃電酥+麵包

（左至右）超級草莓閃電（$32）、檸檬芝士閃電（$30）、是拉差牛油果閃電（$32）、焦糖堅果閃電（$32）

概念店特別推出糅合牛角包同閃電泡芙概念嘅閃電酥（Croclair），同牛角包一樣係25層人手搓製酥皮，上面再加唔同配料。紅莓醬搭新鮮士多啤梨嘅超級草莓，同半熟芝士加青檸檬嘅檸檬芝士口味比較清新。最特別嘅係靈感嚟自墨西哥菜，用泰式是拉差辣椒醬加牛油果嘅配搭！
 

朱古力檸檬酥（$27）

黑啡相間加上方形賣相，估佢唔到其實一樣用咗品牌招牌牛角麵團，除咗上面用青檸點綴，裡面亦有自家製蜂蜜檸檬粒同原條比利時烘焙用朱古力。
 

喺酥脆嘅口感當中同時加入蜂蜜檸檬嘅清新甜味同朱古力嘅香濃。兩種味道各有特色但又唔相斥，有種食緊兩款口味麵包嘅感覺！
 

黑豹芝麻牛角（$32）

品牌最出名嘅牛角包呢度當然繼續供應，芝麻牛角仲升咗呢，喺酥皮加入竹炭粉做成豹紋！裡面就依然係用烘烤黑芝麻粉打成嘅芝麻鮮忌廉，加上蜂巢形嘅酥脆牛角包，甜度適中，一咬口腔立刻充滿芝麻香，但又唔會太甜。
 

麵包採用法國無添加麵粉，唔單止不經漂白，而且會保留更多小麥成分，纖維同其他營養亦自然比一般麵粉高。而牛角包酥脆嘅秘訣係在於用長時間低溫發酵，再用特別手法疊出25層，烘焙至外脆內酥，不過就略嫌牛油香唔夠明顯。注意有餡麵包建議即日享用呀。
 

宇治訥言比高（$23）

同佐敦店一樣，除咗牛角包之外亦有一系列軟包、法式麵包供應，好似呢款宇治訥言比高就選用丸久小山園龍膽抹茶粉，配自家麻糬同納言紅豆蓉 。切開聞落頗有抹茶清香，食落抹茶茶香同紅豆甜味平衡，重度抹茶控就可能會失望喇。加分位係麻糬口感相當軟糯。Bagel口感帶嚼勁，外皮再韌多少少會更討喜。
 

 
精緻法式甜品

品牌名「Ma Douce」係「我的甜蜜」咁解，手作甜品以法式烘焙技巧做基礎，取天然食材顏色而唔用人工色素。而且就返港人口味，所有出品以低糖配方製作，更加健康。
 

（左至右）可可的尾巴（$52）、咖啡的尾巴（$52）、午後的尾巴（$50）、開心的尾巴（$52）、熱情的尾巴（$50）

呢個尾巴系列最有品牌摩登法式甜點風格，底層為杏仁脆餅，慕斯中間就會有唔同口味嘅夾心，好似甘納許（Ganache）、蛋糕等，味道同口感層次豐富。
 

（左）熱情的尾巴（$50），（右）午後的尾巴（$50）

好似熱情的尾巴，熱情其實係指熱情果口味，裡面有芒果焦糖夾心，富熱帶水果酸甜滋味。而午後的尾巴其實係伯爵茶口味，由外面嘅慕斯、裡面嘅甘納許到點綴嘅蛋白餅都係伯爵茶口味，茶香濃郁。留意返因為甜品不添加防腐劑，保存時間會較短。
 

Superfood港式茶飲

（左）蜂蜜菊花普洱奶茶（$36），（右）巴西莓烏龍（東方美人）（$36）

「茶品」係全新登場嘅品牌，茶底都係香港人飲開嘅中式茶，配搭全天然材料，好似用自家熬煮果醬取代糖水。呢杯奶茶嘅茶底用雲南普洱茶葉加入胎菊浸泡，茶湯色澤較濃，味道醇厚帶菊花甘香。搭配明治4.3鮮奶變得口感柔滑易入口，茶上面係蜂蜜蛋白霜，即場燒製增加甜香。

茶飲亦會加入時令水果同Superfood，好似巴西莓烏龍就以一種上等烏龍茶，台灣嘅東方美人為茶底，加入Superfood巴西莓同味道酸甜嘅士多啤梨，茶香同果香平衡。值得一提嘅係品牌本身已經採用低糖配方，正常甜度已經等於坊間手搖飲品店嘅少糖到半糖。當然如果你有需要嘅話，亦可以再要求調整甜度同冰量。
 

品穀 Concept Big Grains
地址：灣仔太和街10-20號福和大廈地下B舖

文：Cathy
相、片：Tom Li