牛魔王要留意啦！呢間高級韓式燒肉喺銅鑼灣開咗第二間分店，裝修融合咗韓式古典同現代設計，食客會有一種喺韓屋食飯嘅感覺。食物方面都有驚喜，推出全新燒烤套餐同埋單點產品。最特別嘅係店員會將牛肉餐車推到枱前，牛肉係韓國全羅南道嘅1++韓牛同日本岩手縣嘅A4和牛，客人就可以揀自己心水部位啦。
「御膳」套餐($420/位，兩位起)
「御膳」套餐雖然要四百蚊，但其實佢足足有成五道菜，有韓牛同日本和牛，份量又多，以呢個價錢嚟講好抵食！女仔的話其實三個人叫二人餐都好夠食。等開飯仔介紹吓呢個餐有咩啦～第一道菜係加拿大牛舌同韓國黑毛豬，黑毛豬由濟州島直送，肉汁豐富。
跟住嚟就啱晒牛魔王啦～第二道菜係一個牛肉拼盤，分別有韓國汁燒牛小排、日本和牛牛胸腹同牛胸，仲有一個是日稀少部位。和牛牛胸腹呈現淺粉紅色，脂肪較多而且肉汁豐富，真係入口即溶㗎！而當日嘅稀少部位就係牛背，相比起其他牛肉味特別濃厚。
第三道菜一樣係牛！而且彈性仲好大，食客可以自選西冷同牛肩嘅產地，日本西冷肉質軟腍，鍾意有口感唔可以錯過韓國牛肩～
香港人不嬲都咁愛海鮮，所以呢個餐就包埋韓國鰻魚同八爪魚兩款海鮮。鰻魚燒得香脆，加埋醬汁就更惹味，比起平時食開嘅日式鰻魚多咗份口感。
最後仲有埋韓國大醬湯同柞木韓牛飯，大醬湯味道鮮甜，韓牛飯加埋流心蛋黃食真係好完美～
牛柳三文治($188)
除咗套餐亦有三款新單點食品，牛柳三文治用咗日本A4和牛，師傅細心將多餘嘅筋位去除，再將最鮮嫩嘅部份煎香至三成熟同輕輕調味，口感外脆內軟。
最上等牛小排($240)
取自牛隻胸腹肉部位，牛味濃郁，質感厚實有咬口。為咗保留肉味建議點鹽食就最好。
柞木甕漬牛肋骨($288)
選用韓國全羅南道嘅短角金毛黃牛，大廚以壺漬古法醃製牛肉，醬汁加入新鮮韓國雪梨蓉、牛骨高湯、醬油同蒜泥等，酵素有肋軟化肉類纖維，令肉質口感軟腍，帶有陣陣果香甜味。
地址: 銅鑼灣記利佐治街1號金百利廣場3樓301室
文、相、片: Yanica
